Niñal: Nganong lisod ang math

“GANAHAN kag math?” gipangutana kong Un-on dihang nagtagay mi sa eskina. “Mag-estorya lang tag abat-abat bay, ayaw lang nang math,” mitubag ko. “Daghang nangutana nako sa Facebook ngano kunong lisod ang math,” ingon siya.

Bitaw, nganong lisod man gyod ning math? Grabeng pag-antos nako ani sa nag-eskuyla pa ko. Akoy kinabugoan kon math nay hisgotan.

u201cGiunsa nimo pagtubag?” ako siyang gipangutana, dayong abli sa akong laptop aron bisitahon ang “Si Un-on ug Si Duyong” nga page. Daghan na nig likes, libo na kapin. “Sikat na lagi ka,” ako siyang giingnan. “Hilom, basaha nang akong tubag,” ingon siya. Ug akong gibasa:

u201cLisod tanan sa kalibotan. Lisod ang pagsuwat, lisod ang pagsulbad sa kurapsyon, lisod ang pagbuhig itik ug ang pagpananom og kamunggay, lisod ning gwapo ta.

u201cBisan ang pagkanta lisod. Abi lang natog sayon kay nagtuo man ta nga maayo tag tingog bisag yabag. Tan-awa nang atong mga singing contest, pagkangil-ad manganta sa uban diha. Apan masuko pang mga kanahan kon mapildi kay nagtuo lagi nga maayo sila.

u201cLahi ang math. Di ta ganahag math kay di nato mailad atong kaugalingon ani. Kon di ka kamao, di gyod ka kamao. Pakauwawan gyod ka sa math ug ipanawong gyod niya nga banga ka.

u201cDi pud ta ganahag math kay maglisod tag relate ani sa kinabuhi (mathematics atong gihisgotan ha, dili basic arithmetic). Mas ganahan tag cinema kay kinabuhi ni, history kay kinabuhi ni, literature kay kinabuhi ni, mga kanta sa Beatles kay kinabuhi ni. Asang kinabuhi sa Calculus?

u201cObjective pud ang math di sama sa ubang fields. Kon moingon ko nga makatabang ang civil war sa Pilipinas kay pag-cleanse ni sa nasud, inyo gyod kong lalison.

Apan kon mangutana kog unsa nang Pythagorean theorem, di ka pwedeng moingon, “Sa akong pangagpas, ang Pythagorean theorem...”

u201cDi ta ganahan anang objective. Maong way padulngan ang away sa manag-uyab, pananglitan, kay imbis mo-stick to the issue sila (objective) mas molabaw man hinuon ang pagbati ug opinyon (subjective) sa usag usa. Ari ta sa subjective kay pwede man natong duwa-duwaan ang mga detalye.

u201cIn summary, defense mechanism nang moingon ta nga lisod ang math. The truth is, di lang gyod nato mailad ning subjeka. Ug mao nay makalagot kay hilig baya ta mangilad.

u201cSa di pa ko manamilit, hibawo ba ka nga ang 1 = 0.999999999...? Ang 0.999 kuno nga gisundan og infinite string of 9s is equivalent to 1. Pagkanindot sa balanse: ang left side nag-represent sa sinugdanan sa mathematics, samtang ang right side nag-represent sa pagkamisteryoso sa mga butang nga way kataposan.

u201cPagka-provocative nga equation. Pagkabigaon. Ug pagka-poetic. - Sa kanunay, Un-on, I drink therefore I am.” (@insoymada)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph