NAPATAY ang gitumbok nga tigpayuhot sa gidiling drugas nga number 2 sa drug watchlist sa kapulisan sa dakbayan sa Naga human misukol ug nakuhaan kinig shabu nga mokantidad og P4 milyones.
Ang patay na nga nadangat sa tambalanan giila nga si Lito Jabonillo, 39, nga molupyo sa Sitio Mohon, Barangay Langtad, dakbayan sa Naga mga pasado alas 5:00 sa hapon niadtong Martes.
Si Jabonillo giingong misukol sa kapulisan atol sa gipahigayong buy bust operation sud sa iyang pinuy-anan.
Ang giingong live-in partner ni Jabonillo nga si Emily Alinsonorin kinsa maoy kauban sa durugista sa iyang pinuy-anan maoy gisikop usab sa kapulisan.
Nakuha sa panimay ni Jabonillo ang moabot sa dul-an 400 ka gramos sa gituohang shabu nga gibana-banang mokantidad og P4 milyones lakip na ang mga timbangan ug kalibre 45 nga armas de fuego nga may mga bala.
Matod ni P/Supt. Gregorio Galsim, hepe sa city of Naga police station, nga si Jabonillo dugay na usab nila nga gipanid-an human mao kini ang gitumbok nga usa sa bigtime drug pusher sa ilang lugar.
Gikatakdang susihon pa sa kapulisan kun kinsa ang supplier ni Jabonillo sa iyang ilegal nga drugas o kun konektado ba usab kini sa gitumbok nga drug lord sa habagatang Sugbo.
Ang nasikop nga giingong ka live-in partner ni Jabonillo nga si Alinsonorin mihimakak nga nalambigit siya kalihukan niini ug gani mihimakak nga aduna silay relasyon.
Iyang gibutyag nasuroy ra siya sa panimalay ni Jabonillo dihang napahigayon ang buy bust operation.