GIPAKITA sa Cagayan de Oro secondary girls ang ilang dominante nga porma agi sa duha ka sunod-sunod nga daug aron moabante sa quarterfinals atol sa nagpadayon nga Northern Mindanao Regional Athletic Association (NMRAA) Meet secondary volleyball girls didto sa Camiguin.
Pabiling walay tatsa ang CDO junior volleybelles agi pagpilde sa Lanao del Norte ug host Camiguin Province.
Gipilde sa CDO Jr. volleybelles ang Lanao del Norte sa unang round agi sa duha ka sets sa iskor 25-15, 25-16, samtang gidominar nila ang Camiguin, 25-6, 25-16 sa sunod nga set.
Maayong kombinasyon sa CDO Jr. volleybelles selection diin gipili ni coach Bobong Rameri gikan sa kadalaing kusog nga mga eskwelahan sa dakbayan.
Gilangkoban ang team nila Martina Chloe Dacer, Angel Mae Jalon, Euricka Eslapor, Chairty Marie Rockwell, Nicole Eve Jarap, Erika Raagas, Rea Maritela Raagas, Kaye Denise Navarro, Athena Sophia Abbu, Gericca Gabutan, Joshel Edrozo ug Nathalie Gyle Galvez.
Masulayan sa CDO secondary girls ang asido sa Valencia City pag-agbat nila sa quarterfinals, diin gidula niadtong Miyerkules, Disyembre 14.