DI ra diay si Konsehal Dave Tumulak ang biktima sa automated teller machine (ATM) skimming sa ilang payroll account kon di aduna pay laing opisyal sa dakbayan sa Sugbo ang nabiktima.
Kon si Mayor Tomas Osmeña gikahadlokan sa mga badlungon, siya giigo sa skimmer.
Gipahibawo ni Osmeña nga nawagtagngan usab siya og kapin P90,000 gikan sa iyang account sa banko diin gideposito usab nagdeposito si Tumulak sanglit mao kini ang pundohanan sa ilang sweldo.
Matod pa sa mayor nga niadtong Oktobre nahitabo ang illegal withdrawals sa iyang account ug sa niaging semana siya nisang-at og reklamo sa tagdumala sa banko nga gipanag-iya sa gobiyerno.
“Ni inquire na (ko) sa bank. They are pulling out the films, getting the video. I’m just quiet because I don’t know the circumstance. It could be an inside job,” paghulagway ni Osmeña sa hitabo.
Gitug-an sa mayor nga katulo ka higayon nag-withdraw sa iyang account ang wala pa mailhing tawo ug ang nababilin sa iyang account wa na kaabot og P100.
Kon mosulod na iyang suweldo sa ATM, iya dayon kining ipa-withdraw ni Konsehal Margarita Osmeña.
Laing opisyal nga gika-report nga nabiktima sa illegal withdrawals mao si kanhi Konsehal ug karon pangu sa Deparment of Social Welfare and Services (DSWS) nga si Lea Ouano-Japson, kinsa nakuhaan og P40,000 sa iyang payroll account.