GENERAL SANTOS CITY -- Misaka na sa P25 milyones ang kinatibuk-ang danyos sa mga pananom nga nadaut tungod sa init nga panahon sa 15 ka mga barangay sa siyudad.
Kini ang gikompirma ni City Agriculture Office head Merlinda Donasco base gisumite nga report niini ngadto sa buhatan ni City Mayor Ronnel Rivera.
Base sa ilang evaluation ngadto sa 15 ka mga barangay nga naigo sa hulaw, anaa na sa 500 ka mga mag-uuma ug 800 ektarya na sa mga pananom ang nangamatay sama sa saging, mais, gulay, lubi ug palay ang nangamatay na.
Ang 15 ka mga barangay nga apiktado mao ang Barangay upper Labay, Batomelong, Tinagacan, Katangawan, Ligaya, Baluan, Buayan, Mabuhay, Conel, Olympog, Sinawal, San Jose, San Isidro, Siguel, ug Tambler.
Giandam na karon sa lokal nga gobyerno ang maong kantidad aron adunay magamit ang mga mag-uuma sa pagsalbar sa uban pa nilang mga pananom.
Sa maong panghitabo, gipulong na ni Mayor Rivera ang mga personahe sa City Agriculture Office, CDRRMC, Barangay Affairs, City Budget, ug City Environment Office aron hisgutan ang daling pamaagi nga maayudahan ang mga mag-uuma.
Nagtuo usab ang mayor nga di lamang ang mga mag-uuma ang naigo sa hulaw apil usab ang mga mananagat.
Giingon nga nga di pa makadeklara ang siyudad og state of calamity tungod wala pa makaabot sa 20 porsiyento ang kinatibuk-ang naapektuhan sa hulaw, di pa usab makapahigayon og cloudseeding ang maong buhatan.
"If in case talaga na mag-worst pa ang situation sa El Niño, ready naman ang ating SP na mag-aproba para supplemental budget. Sa ngayon ready naman ang 3 milyon para paunang tulong sa sa ating mga farmers na affected," pahayag ni Mayor Ronnel Rivera.
Tungod sa nahitabo, gikabalak-an nga magkulang ang suplay sa bugas sa maong siyudad ug kasikbit nga mga lugar. (Emir Bariquit)