SUGOD ugma, ibalik na sa P40 ang flag down rate sa taxi sa tibuok nasod, gawas lang sa Cordillera Administrative Region, base sa mando sa Land Transportation Franchising and REgulatory Board.
Kini nagpasabot nga mawagtang na ang P10 nga provisional rollback sa pletihan sa taxi sa unang 500 metros.
Ang mga taxi nga magbiyahian sa CAR way labot sa mando tungod kay P35 ang pletihan niini sa unang 400.
Sa lima ka pahina nga decision sa board sa LTFRB nga gipakanaog niadtong Biyernes, way umento ang ipatuman sa mosunod nga metros ug sa waiting time sa taxi.
Ang decision pirmado ni LTFRB chair Atty. Martin Delgra ug board members Atty. Aileen Lourdes Lizada ug Engr. Ronaldo Corpus.
Ilang giuyonan ang petition nga giduso sa Philippine National Taxi Operators Association sa miaging tuig kauban ang ubang mga miyembro nga asosasyon sama sa Metro Cebu Taxi Operators Association nga nihangyo nga ipabilin nga usbawan ang flag down rate sa taxi.
Niadtong Marso 2015, provisional nga gilaslasan sa LTFRB og P10 ang flag down rate sa taxi hinungdan nahimo kini nga P30 gikan sa P40, gumikan sa pag-usos sa presyo sa mga produktong petrulyo sa nasod.
Pagka Marso 2016, ang board nga gipangulohan ni kanhi LTFRB chairman Winston Ginez nihukom nga himuon na nga permanente ang P30 nga flag down rate sa taxi.
Apan karong bag-o, tungod sa sunodsunod nga pagsaka sa presyo sa mga produktong petrulyo, nihukom ang bag-ong board nga mga tinudlo ni Presidente Rodrigo Duterte nga ibalik sa P40 ang flag down rate sa taxi.
Base sa decision sa board, sukad gipatuman ang provisional rollback nga P10 sa flag down rate sa taxi niadtong Marso 8, 2016, kapin kun kuwang 30 porsiyento na ang pagsaka sa presyo sa gasolina.