MIKABAT P700-mil ang kantidad sa 53 ka pakite sa gituohang shabu nga nakumpiska gikan sa usa ka kanhi taxi driver atol sa gilusad nga drug bust Martes sa buntag, Disyembre 13, sa Jose P. Laurel Avenue, dakbayan sa Davao.
Si Chief Inspector Hamlet Lerios, hepe sa Sta. Ana Police Station, nag-ila sa suspek nga si Enrico Gamba, alyas Ricky, 50, kanhi taxi driver, taga Pantukan, Compostela Valley Province, kinsa nadakpan atubang sa DLPC Bajada, ning dakbayan.
Nakuha sa posisyon sa dinakpan ang nagkadaiyang pakite sa shabu nga dunay street value nga P700.
Sikop sab ang duha ka lalaki sa laing drug bust nga natigayon alas 2:40 Martes sa kaadlawon sa Barangay San Antonio, Agdao District.
Ang nasikop mao si Rodel Galarce Lariosa, alyas Odiong, 28, nagpuyo sa NHA, Barangay San Antonio.
Alas 5:10 sa buntag, nasikop sab ang usa ka Danny Boy Rosales Gille, 37, residente sa Mitsui Bussan, Barangay 19-B, Poblacion District, kinsa nasikop didto sa SPMC Drive, Dumanlas, Buhangin.
Nakuha sa ilang posisyon ang mga pakite sa shabu ug ang marked money nga maoy nagsilbing ebidensya sa pagpasaka og kasong pagsupak sa Republic Act 9165 kun Comprehensive Dangerous Drugs Act of 2002 sa korte. (JPC)