MGA pagbuto sa bulkan ug mga linog sa Asia ug Alaska nagtimaan nga ang Pacific Ring of Fire aktibo, matod sa United Nations Office for Disaster Risk Reduction (UNISDR).
Sa usa ka post sa Twitter, gitumbok sa UNISDR sa pagbuto sa bulkang Mayon sa Pilipinas ug Mount Kusatsu-Shirane sa Japan, ang magnitude 6 nga linog nga nitay-og sa Java Island sa Indonesia niadtong Martes sa gabii ug magnitude 7.9 nga linog nga nakaaghat og tsunami warning sa Alaska.
Sa Pilipinas, kapin sa 70,000 ka mga tawo ang namakwit gikan sa 8-kilometros nga extended danger zone sa Mayon Volcano sa Legazpi City, Albay samtang nagbugwak kini og lava fountains nga dunay pyroclastic flows nga niagas sa mga lugot sud sa upat ka kilometro sa summit.
Sa Indonesia, usa ka lumolupyo sa Lebak district duol sa epicenter sa linog namatay human makuryentihi dihang nahugno ang iyang balay.
Labing minos 20 ka mga tawo ang nangaangol, apil na sa walo sa mga tinun-an, dihang nahugno ang usa ka atop.
Sa Japan, 12 ka mga tawo, lakip na sa walo ka mga sundawo, nga nag-ski sa kilid sa Mount Kusatsu-Shirane nangaangol tungod sa nanglupad nga mga bato atol sa kalit nga pagbuto. (MVI, AP)