ANG Eastern Mindanao Command (Easmincom) nagmugna og multi-sectoral advisory council nga motabang sa pagpaniid sa kalihukan sa Armed Forces of the Philippines (AFP) ug Philippine National Police (PNP) sa posibleng pagpangabuso sa implementasyon sa martial law sa Mindanao.
Si Easmincom Commander General Rey Leonardo Guerrero nagsulti nga ang tumong sa konseho mao ang pag-obserba kung giunsa paglihuk sa mga tigpatuman sa balaod ug maghatag og maayong tambag kanila kung unsaon nga epektibo nga mapatuman ang balaod.
"Through this council, there will be full transparency and accountability in all actions taken by martial law [implementers]," suma ni Guerrero.
Ang multi-sectoral advisory council, sulti ni Guerrero, langkuban sa tulo ka representante gikan sa mga negusyante, legal, media, relihiyuso, akademya, ug lokal nga kagamhanan.
Siya midugang nga pinaagi sa ilang koordinasyon sa kasamtangan nga mekanismo nga grupo sa Easmincom, ang multi-sectoral governance council, mahimong mopili kinsa ang ibutang sa advisory council.
Ang Easmincom, uban sa 10th ug 4th infantry divisions, mao ang tigpatuman sa martial law sa mga dapit sakop sa Eastern Mindanao.
Si Police Regional Office-Davao Director Police Chief Superintendent Manuel Gaerlan, sa samang pakighinabi, nagsulti nga ang martial law sa kasamtangan nga sitwasyon gilangkuban sa bag-ong lagda sa konstitusyon nga dunay sumbanan aron maseguro nga way mahitabo nga pagpangabuso.
Ang nahisgutang mga opisyal nanawagan sa matag usa nga itaho ang bisan unsa nga pagpangabuso nga mahitabo.