MAGBUTANG og cabinet ang Bureau of Jail Management and Penology (BJMP) nga maoy depositohan sa mga cellphone sa mobisita ug lakip na ang mga kawani sa Mandaue City Jail male dormitory.
Tumong niini aron malikayan nga makagamit og cellphone ang mga bilanggo sud sa prisohan ug ang mga kawani sa BJMP samtang kini nag-duty.
Si Jail Supt. Renante Rubio niingon nga iya kining buhaton aron masiguro ang seguridad sa mga piniriso ug aron malikayan ang scalawags nga mga jail personnel nga konektado sa mga piniriso.
“Cellular phones of all personnel who will report for duty in jail must be surrendered to the duty gater,” matod ni Rubio.
Si Rubio nipahibalo na ni Mayor Luigi Quisumbing nga i-jam ang signal sa sud sa prisohan aron malikayan ang mga aktibidad nga naglambigit og iligal nga drugas.
Dugang niya nga nagpaabot na lang siya karon sa pagpalit og jamming unit sa dakbayan karong tuiga.
Ang pag-jam sa signal sa cellphone giuyonan usab ni Quisumbing sa dihang nahinabi sa mga tigbalita niadto.
Sa milabayng buwan, nipahigayon og greyhound operation ang BJMP 7, Philippine Drug Enforcement Agency (PDEA) 7 ug Mandaue City Police Office sa city jail ug kini niresulta sa pagkasakmit sa pipila ka drug paraphernalia, mahait nga hinagiban ug duha ka cellphones.