PAGHATAG og Christmas gift sa mga senior citizens nga P1,000 sa dakbayan sa Talisay nahimong gubot nga miresulta sa pagkakuyap sa tulo ka tawo ug pagkalipong sa di mominus 30 ka mga senior citizens.
Si Mayor Eduardo Gullas isip mayor miangkon sa responsibilidad sa hitabo apan nakasaway sa nagdumala sa pagpanghatag sa Christmas gift nga mihulagway nga way sistema.
Nasayran nga karong adlawa ipahigayon ang pagpanghatag sa pinaskohan sa kapin 16,000 ka mga senior citizen sa dakbayan sa Talisay.
Ang gihimo mao ang clustering matag gym sa usa ka barangay adunay tag-tulo ngadto sa upat ka barangay ang molangkob diin adto ihatag ang pinaskohan.
Apan mitumaw ang kaguliyang sama nalang sa nahitabo sa Barangay Poblacion, Tabunok ug labaw sa tanan ang pagpanghatag sa Office of Senior Citizens Affairs (OSCA) nga nahimutang sa city hall diin gilangkuban sa upat ka mga barangay ang Mohon, Linao, Lawaan 1 ug Lawaan 2.
Ang reklamo sa mga senior citizen tungod kay way tent nga giandam, way bangko ug inay gamiton ang ilang numero nga gipanghatag isip priority number wa na gamita.
Hinungdan nga mitumaw ang kagubot ang uban nga wa na makaagwanta sa kainit napugos nalang sa pagpauli.
Samtang ang uban nakasaway tungod kay way linya ug nahitabo ang pagduotduot ug tinukmoray nga miresulta tulo gayod ka mga tiguwang ang nakuyapan usa na niini mao si Bienbinido Abaquita, 82, ug adunay 30 ka mga tiguwang usab ang nangalipong ug gitabang sa mga sakop sa Talisay Emergency Rescue Team.
“Akong gipapauli akong bana mobalik nalang seguro mi. Mangwarta ta anang usa ka libo maunsa ta diha kuwang ranang usa ka libo nga ilang gihatag oy,” matod ni Suprema Turino, 65.
Si Francisco Pasturete, 73, miingon nga mas mayo unta nga sa sunod kon dunay ipanghatag mas maayo matag barangay nalang ang ihatag ug lain-lain nalang ang petsa aron di na masubli pa ang kagubot.
Apan si Jesrel Cabiluna sa Treasurers Office usa sa mga mitabang sa pagpanghatag sa kuwarta miingon nga ila nang gihimo ang pagpalinya ug aduna na usay tent nga gibutang apan tungod sa kadaghan sa mga senior citizens gusto nga maoy unang mahatagan hinungdan nga nahitabo ang kaguliyang.
“Grabe sad gyud ang mga tawo sir oy mohamag naman gyud bisan unsaon namog pasabot lisod gyud,”matod ni Cabiluna.
Ilang gipasabot nga daghan ang nagtuo nga kagahapon rang adlawa ang pagpanghatag sa pinaskohan apan hangtod pa kini sa adlawng Biyernes ug sunod semana ang pag-distribute.