KIBLAWAN, Davao del Sur - Daling nakigtagbo ngadto sa militar, kapulisan ug mga personahe sa Department of Education (DepEd) ang mayor sa lungsod aron hisgutan ang pag-resolba sa presensiya sa mga bandido sa bukirang bahin sa lugar.
Nasuspende ang klase sa mga tunghaan sa Barangay Takul niadtong Martes human nasiplatan ang presensiya sa mga sakop sa bandidong B'laan nga buot mohimo og kasamok.
Gumikan niini si Mayor Jason Rama nagpatawag og tigum sa mga sakop sa 72nd Infantry Battalion ug 39th Infantry Battalion (IB) sa Philippine Army, kapulisan ug DepEd aron sutaon ang sitwasiyon.
Di buot sa mayor nga maapektuhan ang pagtungha sa mga tinun-an apil ang panginabuhian sa mga molupyo.
Sumala ni Senior Insp. Erich Von Requilman, hepe sa Kiblawan Municipal Police Station nga mag-alayon ang ilang puwersa ngadto sa kasundalohan aron limpyohan ang lugar gikan sa mga armadong grupo.
Nasayran nga buot mohimo og kasamok ang mga bandido sa mga bukirang bahin aron i-sabotahe ang sitwasiyon.
Sa miaging bulan, nahitabo ang engkuwentro tali sa kapulisan ug mga bandido nga miresulta sa pagkaangol sa usa ka pulis ug usa ka tanod nga nahimong giya sa operasyon.
Hinuon, gipasalig ni Requilman nga kontrolado gihapon ang sitwasiyon ug mohimo na sila og mga lakang nga mahibalik sa normal ang kahapsay'g kalinaw.