WA PAY direktiba nga gipakanaug ang Armed Forces of the Philippines (AFP) Eastern Mindanao Command (Easmincom) nga suspendihon ang military operations batok New People's Army (NPA).
"Wala pang order, tuloy-tuloy parin ang operations namin. We haven’t received yet any directives to suspend military operations against them," sulti ni Easmincom deputy commander and martial law spokesperson Brigadier General Gilbert Gapay Huwebes.
Samtang ilang gikonsidera ang proklamasyon sa National Democratic Front of the Philippines (NDFP) isip maayong katikaran sa pagmando sa ilang armadong grupo nga mohunong sa paglusad og operasyon, si Gapay nagsulti nga ang rebelde sa bukid padayon sa ilang gihimo.
Kini nagpakita, suma ni Gapay, nga ang lider sa NDFP way kontrol sa ilang mga sakop sa bukid.
"Let us be clear that there was only a mutual agreement, the NPAs continue to coerce and intimidate communities and attack some of our patrol bases, which according to Secretary Dureza: should be dealt with accordingly and decisively by the AFP and the PNP (Philippine National Police) with the cooperation of civilian agencies and the affected communities," sulti ni Gapay.
Kahinumdoman nga niadtong miaging semana, ang tropa sa militar miresponde sa report nga dunay pagpanghasi sa mga sibilyan nga gihimo sa mga reblede sa lugar sakop sa Eastern Mindanao.
Mga miresponde nga tropa nakasugat og pinusilay nga miresulta sa kamatayon sa lima ka NPA lakip na ilang front secretary nga giilang si alyas Lepi, apan duha sab ka sundalo ang namatay samtang unom ang naangol.
Lima sab ka patrol bases ang gihasi sa mga rebelde nga gikasamad sa Civilian Armed Forces Geographical Unit Active Auxiliary ug gibanhigan sab ang convoy sa Tamugan, Marilog District, niadtong Dominggo.
"While our designated units continue to implement Martial Law, we cannot abandon our duty to protect the communities from terroristic attacks of other lawless armed groups," suma ni Gapay. (Juliet C. Revita)