Pagtukod og coal power plant gisupak

ILIGAN CITY -- Gitapos dinhi sa dakbayan ang 92-kilometro nga martsa-protesta sa mga grupo nga supak sa katukuran sa mga coal power plants dinhi sa Northern Mindanao.

Gisugdan sa mga raliyista nga gipasi-ugdahan sa Coal Resistance o Core Movement ang ilang paglakaw niadtong nakalabay'ng Dominggo gikan sa Lala, Lanao del Norte nahidangat niadtong Miyerkules sa Kauswagan aron ipakita ang pagsupak sa gisugdan na pagtukod nga coal power plant sa GN Power nga iya sa Ayala Group of Companies.

Gipakita sa grupo ang ilang pagsupak sa tukuron nga coal power plant sulod sa planta sa semento'ng Lafarge Iligan Inc. (LII) sa Barangay Kiwalan nga gikatahong aduna nay environmental compliance certificate (ECC).

Gipanag-iyahan sa Power Source Philippines Energy Inc. (PPEI) ang maong coal plant diin ang LII usa lang sa ilang mga kostumer.

Sa press conference nga gipahigayon, giklaro sa Core Movement ug Philippine Movement for Climate Justice (PMCJ) ang ilang unom ka mga punto nganong angayan supakon ang coal-fired power plants:

1. Guba-on niini ang bahandi sa katubigan ug ang kadagatan

2. Mo-dislocate sa daghang komunidad sa mga mananagat sa dapit

3. Modaut sa mga deklaradong fish sanctuaries ug protected areas

4. Moguba sa kinaiyahan ug modaut sa panglawas ang gamiton nga coal

5. Makadugang sa kainit sa kalibutan ang coal

6. Mobungkag sa mga komunidad tungod kay bahinon man niini ang baruganan sa mga komunidad pinaagi sa mga saad ug hanyag nga materyal.

Dugang gihangyo sa grupo ang mga hintungdang local government units nga dayag ug hugtanon kining mopadayag sa pagsuporta sa kampanya batok sa coal-fired power plants.

Gi-awhag usab sa Core Movement ug PMCJ ang mga LGUs sa pagpalig-on sa mga balaod nga nag-amuma sa kinaiyahan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph