Pahugtanay og depensa
Duwa karon
7:00 p.m. – San Miguel batok Rain or Shine
DEPENSA maoy gituohang yawe sa kadaugan sa panagharong sa San Miguel Beermen ug Rain or Shine Elasto Painters karong gabii sa laing semi-finals best-of-five series sa 40th Philippine Basketball Association (PBA) Governor’s Cup sa SMART Araneta Coliseum.
Ang duha ka teams sulod na sab sa pipila ka mga higayon nga nag-abot sa playoffs.
Sa labing ulahi nilang sangka sa playoffs sa Philippine cup semifinals, grabe ka kulbahinam ang engkuwentro una mingdaog ang Beermen, 3-2, ug gilaumang mao na sab kini ang mahitabo ning higayuna.
Ang Beermen, nga ninghuman sa elimination isip no.2 team dala ang 8-3 nga rekord, nagkinahanglan og duha ka mga duwa una nila nadispatsar ang Meralco Bolts sa quarter-finals.
Ang Elasto Painters, nga maoy no.3 team, nagkinahanglan og duha ka mga overtime aron mapahimuslan ang ilang twice-to-beat nga bintaha ug palagputon og sayo ang Barako Bull, 134-124.
Sa nag-inusara nilang duwa sa elimination round, gipangmakmak sa Beermen ang Elasto Painters niadtong Mayo 12 apan wala kini nagpasabot nga makonsiderar nang inilog ang 1989 Grandslam champion.
“Offensively we are okay. But it’s defense that wins a championships so we need to buckle down more on defense,” asoy sa usa sa mga sinaligan sa Beermen nga si Marcio Lassiter.
Ang import sa Beermen nga si Arizona Reid, kinsa nag-average og 26.9 ug 10.5 rebounds, makigparang kang Wendell McKines, kinsa mas maayo og gipakita.
Si McKines nag-average og 28 puntos ug 14.6 rebounds.
Ang Beermen magsalig sab og maayo sa higanteng Sugbuanong nga si JuneMar Fajardo, kinsa nalantawan nang daan nga mahimong back-to-back MVP karong tuiga.
Ang ubang mga pambato sa Beermen mao sila si Alex Cabagnot, Ronald Tubid, Chris Lutz, Arwind Santos ug Chris Ross samtang sa habig sa Elasto Painters mao sila si Paul Lee, Chris Tiu, Raymond Almazan ug ang gitawag og Extra Rice Inc. nga sila si Beau Belga ug JR Quinahan.