NIULI ang pambato sa Mindanao Ultimate Mixed Martial Arts (Mumma) unom ka gold, tulo ka silver, ug duha ka bronze medals atol sa 2017 Muay Thai National Open 3rd Leg, diin nahuman niadtong Dominggo, Hulyo 16, sa Dumaguete City.
Naka-gold sila Gianni Garrido 67 kilograms (kgs), Russell Fabroa (51kgs), Yncent Pol Kalaw Calibjo (67kgs), Chazz Mayo (85kgs) ug Jasper Ray Navarro (75kgs) sa men’s advance division.
Si Angelie Sabanal mao lang ang babae nga fighter sa Mumma nga nibira og bulawan sa 51 kgs women’s advance.
Nibira sab og silver sila Kirby Jay Pungtod (67kgs) ug Paul Galope (48kgs) sa men’s advance, samtang si Katrina Limbaroc (51 kgs) nakakuha sa women’s advance.
Niangkon sab og bronze sila Joshua Jude Paclar (63.5kgs) ug Haresh Frederick Dela Serna (63.5kgs) sa novice division.
Duha sa Mumma’s Jiu Jitsu fighters miangkon og gold ug tulo ka silver medals sa 1st Caraga Brazilian Jiu Jitsu Gi and No-Gi Invitational 2017 niadtong Sabado sa Robinsons Place sa Butuan City.
Nibida si Joyce Vega human mibira siya og usa ka gold ug usa ka silver medal sa Gi ug No-Gi 72 kgs women’s divisions, sunod-sunod.
Si Ely Fernandez, ang prized Muay Thai fighter sa Mumma, niuli og tagsa nga silver sa Gi ug No Gi nga mga kategoriya sa 55 kgs men’s division.