DIGOS CITY -- Nawad-an na og paglaum nga makaangkon pa og hustisya ang ubang pamilya sa mga nabiktima sa Maguindanao Massacre nga mag-walo na ka tuig karong Nobyembre 23.
Gibutyag ni Digos City Indigenous People’s Rep. Datu Ernesto Salaysay nga nawad-an na sila og paglaum nga makab-ot pa ang hustisya tungod sa kalangay sa pagdungog sa kaso.
Si Ernesto mao ang maguwang ni Nap nga usa sa 32 ka mga mamahayag nga naapil sa 58 ka mga biktimang namatay didto sa Sitio Masalay, Datu Unsay Ampatuan, Maguindanao.
Anaa lamang sa Sitio Napan, Barangay Goma ning dakbayan gilubong si Nap sa ilang yuta mao nga duol ra ang pagduaw sa pamilya.
Giangkon sab ni Ernesto nga nakadungog siyang miatras na ang ubang pamilya sa pagduso og kaso batok sa mga Ampatuan human nabayran.
Si Ernesto nagbutyag nga sud sa walo ka tuig wa nila nabati nga makaangkon pa og hustisya nga ilang gipakigbisogan.
Kahinumdoman, nahitabo ang Maguindanao Massacre sa mismong adlaw nga mosang-at sa iyang Certificate of Candidacy si Maguindanao Governor Ismael Mangungudatu.
Apan, naapil ang mga mamahayag nga igo lang mikuyog sa asawa sa gobernador ug pamilya niini nga maoy miduso sa kandidatura.
Sa taliabot nga anibersaryo sa masaker gibutyag ni Ernesto nga magsindi na lang sila og kandila aron ihangad sa kahitas-an ang dagan sa kaso. (OBD)