AMAHAN ug anak nga pulos mga seaman nangamatay human ang ilang gisakyang awto nadasmag sa punoan sa kahoy samtang nagdagan sa Cebu South Coastal Road sa Barangay Cansojong, dakbayan sa Talisay alas 12:10 kagahapon sa kaadlawon.
Ang kapulisan niila sa mga biktima nga mao sila si Isidrito Boiser, 61, ug iyang anak nga si Jovan, 43, pulos taga sitio Bravo, Barangay Cansojong.
Matod ni PO1 Ruel Detuya, imbestigador sa Talisay City Traffic Division, nga gikan sa habagatang bahin sa Sugbo ang duha ug paingon sa dakbayan sa Sugbo.
Ang amahan ug anak nagsakay sa awto nga Honda Civic (plate no. WJU-278) nga gimaneho ni Isidrito.
Sa ilang pakisusi sa mga saksi, kusog ang dagan sa gisakyan sa duha ka mga biktima.
Aduna kini giunhan nga laing sakyanan, apan tungod sa kakusog sa dagan, wa na makontrol sa drayber ang manubela hangtud nga nisaka ang ilang sakyanan sa center island dayon nidasmag sa punoan sa kahoy.
Adunay pagduda ang kapulisan nga adunay gikalumba nga laing sakyanan ang amahan ug anak.
Ang nadasmagang punoan sa kahoy nabali sa kakusog sa impact.
Gani tungod sa kakusog, nalabay pa ang makina gikan sa sakyanan.
Sila si Isidrito ug Jovan maayong pagkapiit sa front seat.
Dali silang gipangdala sa Talisay District Hospital apan gideklarar nga dead on arrival.
Sa nakuhang identification (ID) card sa kapulisan gikan sa duha, nasayran nga pulos kini mga seaman.
Ang asawa ni Isidrito nga si Lolita nikompirmar nga seaman ang iyang bana, apan retired na samtang ang iyang anak, bag-o lang nipauli aron motambong sa graduation sa iyang anak.
Matod niya nga aduna silay bisita nga gihatod ug sa dihang paingon na sa pagpauli, didto na nahitabo ang aksidente.