NALANGKAT sa Pardo Elementary School ang ikatulong dapit sa Jingle Contest sa Department of Education Cebu City Division.
Si Mary Ann E. Dumaran, maestra sa PES, maoy gitahasan sa ilang principal, Arlene A. Caballero, nga maoy mosuwat sa lyrics ug mopili sa mga maestra nga moapil sa contest nga gisalmotan sa 16 ka mga tunghaan sa South ug North District nga sakop sa maong division.
Ang kalihokan gipahigayon atol sa “Education Week” sa DepED Cebu City Division niadtong Disyembre 2016 sa Zapatera Elementary School, siyudad sa Sugbo.
Sa pagsulat ni Dumaran sa jingle, iyang gihunahuna ang tumong sa programa, ang mga nahimo sa mga magtutudlo aron mas malantip ang kinaadman sa kabataan, ang mga paningkamot sa DepEd Cebu City Division alang sa kalamboan sa edukasyon, ug kon unsa ka mahinungdanon ang edukasyon alang sa tanang katawhan.
"Makaingon ko nga ang kalidad sa edukasyon sa Cebu City Division garantisado ug sigurado," pamulong ni Dumaran.
Iya usab gipahimug-atan nga angayan hatagan og bili ang edukasyon aron magmabungahon ug magmalambuon ang tagsatagsa ka kinabuhi.
Siya niawhag sa mga Sugbuanon nga magtinabangay aron kalidad nga edukasyon mapadayon alang sa maayong kaugmaon sa kabataan. (PR)