PASAHERO nga lalake ang wala na igkita human giingong nilayat sa dagat samtang naglawig ang gisakyang barko nga nagbase sa dakbayan sa Sugbo padung sa siyudad sa Cagayan de Oro (CDO) alas 11 sa miaging gabii.
Ang barko nigikan sa pier 1, siyudad sa Sugbo ug nagpaingon sa CDO dihang nahitabo ang insidente.
Si Coast Guard Station Cebu Commander Dionilett Ampil niingon nga wa sila makadawat og taho bahin niini ug nagtuo nga ang lalake nilayat sa dagat nga sakop na sa hurisdiksyon sa CDO.
“Wala kaming natanggap na report na may pasaherong tumalon mula sa barko,” matod sa commander sa Superbalita Cebu kagahapon.
Matod ni Ampil kon sa kadagatan sa Sugbo kini nahitabo, mahibawo o pahibaw-on sila bahin niini.
Pipila ka mga pasahero sa barko ang nakabantay pa sa lalake samtang wala pa moambak sa dagat.
Si Jerome Murad, pasahero, namahayag nga gihatagan pa niya og sigarilyo ang lalake sa wala pa ang hitabo.
“Akong tan-aw ato niya naa jud to siya’y problema,” dugang niini.
Laing pasahero nga usa ka inahan nakaestorya pa ang lalake nga nagpaila niya sa pangan nga Johar nga taga siyudad sa Carcar.
Usa ka Paloy, laing pasahero, tapad og higdaanan ni Johar, niingon nga “mura man to siya'g gatama.” Ang barko nidunggo sa pantalan sa CDO kagahapon sa buntag.
Nailhan na ang pasahero sa kompaniya sa barko (ngan gipugngan human wa mohatag og pormal nga pamahayag) apan, wala pa kini makit-an sa pagkutlo ning balita.
Ang port terminal sa maong kompaniya dinhi sa Sugbo namahayag nga nagpaabot pa kini sa pangan nga iduso sa buhatan niini sa CDO. (Dugang taho sa SunStar Cebu)