Paz magpasubli ubos sa LP sa 2016 elections

INCUMBENT Lapu-Lapu City Mayor Paz Radaza mideklarar na sa iyang tinguha nga magpasubli pagka-mayor ubos sa partido Liberal (LP) sa umaabot nga 2016 election.

“Naa pa man koy third term,” mubo nga tubag sa mayor sa dihang nahinabi sa mga tigbalita.

Iya usab nga gipahibawo nga magsilbi niyang running mate pagka-bise mayor ang incumbent city vice-mayor Marcial Ycong, samtang wa mobutyag ang opisyal sa kompletong slate sa mga konsehal.

Matod pa ni Radaza nga iyang ipadayon ang iyang nasugdan nga proyekto sukad sa iyang unang paglingkod sa city hall niadtong 2010 nga naglangkob sa pagpalambo sa turismo, edukasyon, panglawas, livelihood ug infrastructure.

Sa sayo pa, nahimong kontro­bersiyal ang gikatahong pagpada­yag og interest sa kapikas sa mayor nga si kanhi kongresista Arturo “Boy” Radaza nga magpapili pagka-mayor, human sa giingong pag­pangayog suporta ngadto sa mga sakop sa Association of Barangay Council (ABC) sa maong tinguha.

Mga barangay kapitan sa dakbayan ang migama og resolution nga gipirmahan sa pipila sa mga kapitan sa dakbayan nga mipadayag sa ilang kahinam nga ipadayon ni Mayor Radaza ang iyang nahibiling termino.

Igo lang sa milingo-lingo ang opisyal sa dihang gipangutana kon nagkasabot na siya ug si kanhi kongresista Boy Radaza kabahin sa maong kalambuan.

Namatikdan nga adunay mga tricycle unit sa Lapu-Lapu ang adunay stickers nga natala “We love Mayor Paz 2016” ug laing stickers nga mikatap sa pipila ka mga residential area nga “Mayor Paz, Ipadayon ang Kalamboan”.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph