GIPLANO ug gihan-ay na sa Misamis Oriental Provincial Risk Reduction Management Department (PDRRMD) ug City Disaster Risk Reduction Management Office (CDRRMO) sa Cagayan de Oro City ang gikatakdang dakong selebrasyon sa Semana Santa sunod semana.
Gibutyang ni CDRRMO Officer Allan Porcadilla nga lakip sa ilang gi-alerto nga gikatakdang dagsaan sa daghang tao mao kini ang Malasag Garden diha sa Cugman, Our Lady of Guadalupe sa Barangay Tablon ning dakbayan.
Nakaandam na ang ilang mga sakop sa pagtubag sa mga panginahanglan sa katawhan nga magpanon sa nanganlan nga dapit.
Dugang sab niini nga gikoordinar na usab nila ang Roads and Traffic Administration ug Cagayan de Oro City Police Office lakip ang nagkadaiyang ahensya aron sa pagtabang panahon sa emerhensya, ug pagpahapsay sa dagan sa trapiko.
Samtang sa iyang bahin sab ni PDRRMD Head Fernando Vicente Dy iyang gibutyag nga naka-ready na usab sila sa paghatag seguridad sa mga potensyal nga dagsaan sa katawhan sa Misamis Oriental.
Sayod siya dili lang ang taga Misamis Oriental mismo ang gabisita ug gapanaad sa mga lugar apan adunay nagikan pa sa nagkalain-laing dapit nga moanha sa Divine Mercy Shrine sa dakbayan sa El Salvador ug Sipaka Point sa dakbayan sa Talisayan.
Kon seguridad ang hisgotan alerto ang mga kapolisan ug kasundalohan niini ug ilang gilikayan karon ang giingong hulga sa terorismo dinhi sa dapit. (SVB)