LANGYAW nga nasikop sa National Bureau of Investigation (NBI) 7 human gidudahan nga usa ka pedopilya, naghikog sulod sa detention cell sa ahensya kagahapon sa kaadlawon.
Si NBI 7 Regional Director Patricio Bernales, Jr., nipahibalo nga alas 6:40 kagahapon sa buntag na nadiskrubrehan ang lawas sa American national nga si Jesse Golden Phinney, alyas Jaime Peterson, nga naghigot sa iyang liog og bakus sulod sa banyo sa NBI detention cell.
Naila sab siya sa mga ngan nga Jamie, Japie ug Daddy.
Uwahing nakit-an si Phinney pasado ala 1 sa kaadlawon sa nag-roving nga gwardiya sa NBI. Siya rang usa ang sulod sa detention cell.
Pasado alas 2 sa kaadlawon, nakadungog og kasikas ang babayeng piniriso sa tupad nga detention cell, gikan sa dapit diin gipriso ang langyaw.
Si Phinney nasikop sa NBI niadtong Lunes sa gabii sa giabangang balay sa Camella Homes, Brgy. Lawaan, Talisay City.
Kini pinasikad sa warrant of arrest nga giluwatan ni Talisay City RTC Branch 66 Judge Jacinto Fajardo.
Atol sa operasyon, usa ka 8-anyos nga batang babaye ang na-rescue sa mga awtoridad.
Nag-atubang og kasong kalapasan sa Sec. 5, Article III sa RA 7610 kun Anti-Child Abuse Law ang maong langyaw.
Ang medico-legal officer sa NBI 7 nga si Dr. Rene Cam maoy nisusi sa lawas ni Phinney.
Nasuta nga asphyxia due to hanging maoy hinungdan sa kamatayon niini.
Disyembre sa miaging tuig, ang Provincial Women’s Commission nitaho sa NBI labot sa giingong human trafficking activities nga gikalambigitan sa usa ka foreign national sa dakbayan sa Talisay, nga mamiktima og mga menor de edad.
Sa imbestigasyon sa NBI, dunay lima ka mga bata nga giingong gi-abuso ug gipahimudsan niini.
Adto niya buhaton ang pag-molestiya kanila sa laing balay nga iyang giabangan sa Aureo street, Brgy. Maghaway, sa siyudad gihapon sa Talisay.
Niadtong Hunyo karong tuiga, niluwat og search warrant si Cebu City RTC Branch 20 Judge James Himalaloan aron maukay ang pinuy-anan ni Phinney ug makakuha ang mga awtoridad og forensic evidence batok kaniya.
Apan wa pa gani maimplementar, nakalarga na siya sa gawas sa nasud.
Agusto ning tuiga, napasakaan og pormal nga reklamo sa Talisay City Prosecutor’s Office si Phinney, apan sa ngalan nga “Jaime Peterson”, nga usa sa mga alyas nga iyang gigamit.