PERMANENTE na nga P30 ang flagdown rate sa taxi sa tibuok nasod, gawas lang sa Cordillera Administrative Region (CAR) human aprobahi sa Land Transportation Franchising and Regulatory Board (LTFRB) ang bag-ong pletihan.
Kini moepekto sugod sa Marso 19, kun 10 ka adlaw human sa publication sa mantalaan.
Ang hukom sa bag-ong pletihan aprobado sa en banc ug pirmado nila ni LTFRB Chairman Winston Ginez ug Board Members Antonio Enrile-Inton Jr. ug Ronaldo Corpuz.
Ang LTFRB nihukom nga magpabilin sa P3.50 ang succeeding rate apan hangtod na sa matag 500 metros gikan sa matag 300 metros sa kasamtangan.
Ang LTFRB nitakda usab sa bag-ong pletihan sa P3.50 sa waiting time matag 90 segundos.
Alang sa mga airport taxi, matod ni LTFRB 7 acting regional director Reynaldo Elnar, gimando ang P60 nga permanenteng flag down rate alang sa unang 500 metros ug dugang P4 sa matag mosunod nga 500 metros samtang, laing P4 alang sa waiting time nga 90 segundos.
Si Ginez nipasabot nakab-ot ang desisyon gumikan sa sunodsunod nga pagkanaug sa presyo sa mga produktong petrulyo nga napahimuslan sa transport sector.