PAGTAN-AW nako sa “Ang Pambansang Third Wheel” starring Yassi Pressman ug Sam Milby sa SM Cinema Consolacion niadtong Dominggo sa 4 p.m. nga showing, hala, unom ra ang nanan-aw.
Pagkataudtaud napun-an og duha, so siyam mi tanan apil nako.
Paglabay sa 30 minutos, uy, dunay nanggawas. Wala na mamalik. Wa kauyon?
Kinsa man say direktor atong salidaha mura man og gidalidali. Naa ra ba untay potential ang estorya.
Maldito
Nakit-an sad nako niadtong Dominggo ang social media celebrity nga si Medyo Maldito nga kugihan kaayong nihimo og pasundayag sa lobby sa SM Cinema sa Consolacion aron i-promote ang iyang pelikulang “Magbuwag Ta Kay”.
Obviously, nakatabang ang iyang promo show, kay kon siyam ra mi sa “Pambasang Third Wheel”, sa “Magbuwag Ta Kay” sa 4 p.m. nga showing kay 20 kuno kabuok ang nanan-aw, matod pa sa tiketera.
Mingaw
Sukad nisud ang 2018, mga 14 na ka Pinoy movies ang gipasalida pero wala pa gyuy usa nga matawag nga box office hit.
Dire sa Cebu, kasagaran sa mga pelikula nga Tagalog di gani abtan og semana, sama sa “Amnesia Love” (Paolo Ballesteros ug Yam Concepcion), “Mr. and Mrs. Cruz” (Ryza Cenon) ug “Mama’s Girl” (Sofia Andres ug Diego Loyzaga).
Bisan ang launching movie nilang Elmo
Magalona ug Janella Salvador nga “My Fairy Tail Love Story” nga gipasalida sa miaging buwan, way balita pilay kita.
Kon kusog pa to, manghambug na unta si Mother Lily ug ang ABS-CBN. Pero mingaw pa sa tirana. Bitaw no, pila ba’y kita sa pelikula nilang Elmo ug Janella?
Bastos!
Nireklamo ang mga entertainment blogger sa Manila tungod sa pagka-esnabera ug bastos kuno si Sofia Andres.
In fairness, katong nainterbyu pa nako si Sofia niadtong 2012 sa imbitasyon ni Ms. Rosemarie Gaisano, buotan ra man si Sofia. Dili pa hinuon siya sikat ato.
Ambot lang ha pero akong nabantayan ang mga artista sa ABS-CBN kay mga arte ug feeling high and mighty (pero dili tanan kay naa man say buotan sama nilang Carlo Aquino ug Matteo Guidicelli).
Si Paolo Avelino na lang, for example, sa dihang naa pa sa GMA pagka-humble na man lang ug simple ra kaayo, kay na-interbyu man ni nako siya Kapuso pa siya.
Pagbalhin niyag ABS-CBN, attitude na man kaayo. Utro sad si Cristine Reyes duna sad koy bad experience ana.
Naka-relate ko sa panawagan karon sa kanhi presidente sa National Press Club ngadto nilang Charo Santos ug Gabby Lopez-- “Ganito ba talaga ang talent n’yo sa Star Magic?”