Piolo Pascual naa sa City Mall-Consolacion

SI Piolo Pascual ang kumpirmadong moabot karong Biyernes, Sept. 29 sa Sugbo alang sa promo tour sa reunion movie nila ni Toni Gonzaga nga “Last Night.”

Si Toni maorag dili kuno kakuyog. Way gihatag nga rason pero duda ko basin busy tingali si Toni sa pagpreparar sa first birthday sa iyang baby kay di ba Sept. 30, 2016 man to natawo ang iyang anak? Basta first birthday dapat man gyud kuno nang hikayan o partehan. Sige, hatagag chance.

Matod sa Star Cinema Regional Specialist, Ms. Josie S. Pereyra nga moadto si Piolo sa City Mall sa Consolacion aron maoy moabli sa bag-ong sinehan didto. Aw, naa na diay sinehan ang City Mall, Ma’am Jos? Excited kong motan-aw unsay hitsura.

Ug kay showing na ang “Last Night” ugma, Miyerkules. Adto ta manan-aw sa City Mall karong Biyernes kay tua si Papa P.! Kitakits!

“American Made”

Kita na mo sa pelikulang “American Made” ni Tom Cruise? Nindot pagkahimo.

Ang estorya base sa tinuod nga hitabo nga naglambigit sa Colombian drug-smuggling ug CIA nga maoy hapit makaguba niadto sa administrasyon ni kanhi presidente Ronald Reagan.

Karaan sad kaayo ang ilang setting, diin beeper pa’y ilang gigamit. Wala pa mauso ang cellphone, laptop ug internet.

Nakakita sad ko sa horror movie nga “IT” nga showing pa hangtod karon, lingaw sad.

Ang “IT” base sa sikat nga nobela ni Stephen King nga dunay susamang ulohan. Mga pito ka bata ang bida dinhi nga maoy nakigbugno sa evil clown nga si Pennywise, kinsa manguha og mga bata sud sa pila na kasiglo.

Boring Kingsman

Ang way ayo nga akong nakit-an sa miaging semana ang “Kingsman: The Golden Circle.”

Boring salidaha, taas ra ba kaayo (2:20 mins). Mas arang-arang pa tong original nga Kingsman niadtong 2015. Kini karon kay way klaro, bayolente pa kaayo pero puros ra inamaw.

Star-studded ra ba kay naa silang Halle Berry, Julianne More, Channing Tatum, Elton John ug Jeff Bridges nga puros mga haligi sa Hollywood. Pero unsaon nagkayamukat ang dagan sa Kingsman isip spy-action-comedy film.

Nakakita sad ko sa “Loving in Tandem” nilang Maymay Entrata ug Edward Barber, hilaw pa gyud tinuod pero at least dunay potential ang mga bagets. Dapat ni Edward seryusohon ang pagtuon og tagalog aron mas maka-konek siya sa audience. Si Kisses ug Marco kay pareson.

So far, not bad.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph