ARON paghatag og igong kahigayonan, ang tagdumala sa tinuig nga PowerPlay Basketball Camp mipahibawo sa ilang kaandam nang modawat og reservation alang sa umaabot nga inadlawang training session atol sa baskasyon.
Si Larry Villanil, ang kanhi player sa Barangay Ginebra sa PBA nga mao usab ang training director sa maong camp, mibutyag nga sa Abril 2, sunod buwan sugdan na ang Level One sa ilang training diha sa Lapu-lapu City Auditorium (kilid sa simbahan sa Birhen sa Regla).
Kini mosugod sa alas 7:30 hangtod na sa alas 10:00 sa buntag gikan sa adlawng Lunes ngadto na sa Biyernes.
Itudlo ni Villanil ug sa iyang mga training staff ang basic sa basketball sama sa saktong posisyon sa pag dribol ug sa samang higayon pagdepensa sa bola, ang saktong porma sa itsa, unsaon pagdefense ug ingon man sa pagpasa.
Lakip sa makat-onan sa mga partisipante mao ang disiplina ug respeto ngadto sa mga kauban sa matag duwa.
Dugang ni Villanil nga alang sa mga interesado mahimong mokontak lang kaniya sa cellphone number 0933 034 4586 o kaha sa tel. no. 495 5499.
Ang njahisgutang training camp nakaumol na usab og mga players nga anaa na karon magduwaan sa mga dagkong liga dili lang dinhi sa Sugbo kon dili lakip na usab didto sa Kaulohan. (PR)