Premium sa SSS posibling mosaka

POSIBLING mosaka ang kontribusyon sa mga aktibong miyembro sa Social Security System (SSS) sa higayon nga maaprobahan ang Senate Bill (SB) 2879 nga naghatag og tag P2,000 nga usbaw sa pension sa mga retiradong kawani sa pribadong kompaniya.

Kini ang gibutyag ni Mario Corro, branch head sa SSS- Cebu human giaprobahan sa Senate Committee on Government Corporations and Public Enterprises ang balaudnon ni Sen. Cynthia Villar nga naghimong P5,000 nga madawat sa mga pensioner matag buwan gikan sa orihinal nga P3,000.

Matod pa ni Corro nga kon mahingpit nang balaod ang SB 2879, obligado nga mopatuman ang SSS apan ilang gipadayag nga magkinahanglan kini og P49 bilyones matag tuig para mahatagan ang 1,043,026 ka pensioner gikan niadtong Marso 15 ning tuiga.

Dugang ni Corro nga posibleng maapektuhan sa increase sa umaabot nga panahon ang mga aktibong miyembro kinsa maoy nagbayad og binuwan nga premium sa higayon nga sila mopahimulos sa ilang mga benepisyo.

Iyang gipadayag nga adunay pundo ang SSS nga molanat hangtod sa tuig 2042 apan kon mapatuman ang usbaw nga P2,000 hayan ang ilang pundo kutob ra sa tuig 2029 hinungdan nga wala silay laing mahimo kon dili ang pagpasaka sa premium.

Sa kasamtangan, ang SSS adunay 11 porsiyento nga gikibhang kansang empleyado nagsweldo og labing taas P16,000 matag buwan nga gibahin sa kaduha, ang employer maoy niangkon sa 65 porsiyento samtang 35 porsiyento ang giabaga sa mga trabahante.

Si Corro wala nibutyag kon pila ka porsiyento ang iusbaw sa SSS sa binuwan nga sweldo sa mga trabahante apan iyang gibutyag nga mao kini ang alternatibo nga paagi para maluwas ang SSS ug posible usab silang mangayo og ayuda gikan sa National Government.

Gipasabot niya nga hayan ipa­tuman ang increase pinaagi sa data-data o lump sum kon tingob nga pagbayad sa mga kawani.

Ang branch head sa SSS niawhag ngadto sa minilyon ka mga miyembro sa SSS nga magpositibo sa ilang panglantaw sanglit ang maong pundo kon increase para lang sa kaayuhan sa mga kawani sa higayon nga sila moretiro sa pagpanarbaho.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph