DUGAY nang panahon nga nahimo natong amahan sa dakbayan sa Davao ang atong Presidente Rodrigo Roa Duterte sulod sa 22 ka tuig. Usa ka termino nga congressman sa unang distrito, apan bisan usa kanato wala gyud makatugkad kon unsay iyang plano labi na kon politika ang hisgutan.
Balikan nato ang nangagi, nagdahom ba kita nga modagan siya sa pagka- presidente? Dili ba sa istorya prangka prangka manumpa pa nga dili siya haom sa posisyon? Sa istorya, pero sa buhat kanunay naglibot sa tibuok Pilipinas aron i-promote ang pederalismo kay mosuporta siya’g kandidato nga maoy mousab sa atong sistema.
Katapusang adlaw sa pag-file sa certificate of candidacy, wala siya sa han-ay nga magpapili sa pagka- presidente? Unsay nahitabo nag- substitute sa usa ka tawo nga walay kapasidad nga mokandidato sa pagka-pangulo.
Dili palang dugay, gisulti niya atubangan sa hut-ong sa mga sundalo didto sa lungsod sa Mawab, Comval Province nga bisag molampas lang og usa ka adlaw sa katapusang adlaw sa iyang termino magpapusil siya sa mga sundalo o sa mga police.
Wala ba kamoy namatikdan? Sama kaniadto, dili siya modagan pagka- presidente, pero naglibutlibot sa atong nasud aron pagpromotar sa bag-ong sistema sa gobyerno? Karon, kanunay niyang gibalikbalik nga dili ug dili na niya tapuson ang iyang termino, dili mahitabo nga mosobra siya sa usa ka adlaw sa iyang termino, kay supak sa atong Constitution? Supak kon kini nga Constituttion maoy subayon, pero dili na kay ang bag-ong batakang balaod kon molingkod siya sa pagpa-presidente o Prime Minister.
Nagsige siya’g balibad sa pulong, apan gipursige niya ang kongreso nga dalion pagbag-o ang atong batakang balaod ubos sa pederalismo nga dili maabtan pagkatapus sa iyang termino sa tuig 2022 kay ilegal na ubos sa 1987 Constitution.
Suma total, dako ang atong pagtuo nga siya pa gihapon ang atong presidente tapus sa iyang termino sa 2022, ubos sa bag-o nang sistema sa atong gobyerno ma-Federal presidential man, o Federal Parliamentary kon diin siya ang atong Prime Minister.
Kamo nalay mag-Duterte? Ang iyang gipanulti, sukwahi sa iyang ginabuhat.
Davao del Sur
Sa Davao del Sur, katapusan namong istorya ni Governor Douglas “Dodo” Cagas iyang giingon nga gikapoy na daw siya, magpili nalang daw siya og lig-on nga kandidato nga iyang suportahan pagka-gobernador karong umaabot nga eleksiyon 2019.
Pero sa tinuod lang, governor, wala gyuy motuo, bisan ako di ko motuo kay wa nay laing lig-on nga politiko diha sa Davao del Sur, ikaw ra.
Sumala, dili basta basta nga partida ang nahitabo sa milabay nga piniliay kay 45 ka adlaw nga wa ka makita sa mga katawhan nga mibarog sa entablado pero, gibuntog mo ang imong kaatbang?
Ayaw na ihatag sa imong kaaway sa politika ang Davao del Sur, governor, nga gipangguba lang ang imong mga proyekto.
Ikaduha, may lig-ong liderato pud si Congresswoman Didi Cagas kay bisag siya lang nagkampanya midaug ka, tungod kay gimahal mo sa mga katawhan sa Davao del Sur. So, ayaw sila pakyasa.