ORMOC CITY, Leyte - Giklaro sa Police Regional Office (PRO) 8 ang rason sa pagbalhin ni P/Cinsp. Jovie Espenido sa Ozamiz City.
Si P/CInsp. Bella Rentuaya, tigpamaba sa PRO8, nagkanayon nga alang sa promosyon ang pagbalhin kang Espenido.
“The reassignment was for good. It is like a promotion for chief inspector Espenido in as much as yung binigay na pwesto is supposed to be run by a police superintendent,” matod ni Rentuaya.
Dugang ni Rentuaya duna usab gihatag nga misyon kang Espenido si Police Director General Ronald ‘Bato’ Dela Rosa.
Si Rentuaya miingon nga way kamatuoran ang nikatap nga istorya nga dunay pulitiko nga nagpaluyo sa pagbalhin kang Espenido.
Di usab rason ang kontrobersiya nga nalambigitan ni Espenido sa Espinosa drug trade.
Mihangyo usab si Espenido nga gawas kaniya, uban usab niya nga ibalhin ang laing 15 ka pulis nga iyang mga tawo.
Gitataw ni Rentuaya nga bisan og wala na si Espenido sa Eastern Visayas, ipadayun gihapon ang pagpasaka og kaso niadtong ubang opisyal nga nalambigit sa Espinosa drug trade.
“Patuloy pa rin po. Yun ang utos ni RD (Elmer Beltejar) kahit wala na si Espenido,” sumala ni Rentuaya.
Nagpadayon hinuon ang case build up alang niadtong ubang indibidwal nga giingong apil sa Espinosa drug trade.