GIPABILIB sa nag-unang mga protagonista sa Pinoy Pride 43 :The Battle in Bohol boxing promotion ang boxing fans nga nagdasok sa Island City Mall sa Tagbilaran City sa pagtan-aw sa ilang public workout.
Ang ALA fighters nga sila si Mark “Magnifico” Magsayo, “Prince” Albert Pagara, ug Jeo “Santino” Santisima ningpakita sa sestima nga ilang gisunod sa ilang pagbansaybansay.
Gikan sa shadow boxing ngadto sa mitts kauban ang ilang trainers nga sila si Edmund Villamor ug Michael Domingo, ang tulo ka mga boksidor nagpakita sa ilang tagsatagsa ka abilidad.
Human sa public workout, ang boxing fans sa Bohol nahatagan og kahigayunan nga makapahulagway kauban ang ilang gi-idolong mga boksidor.
Si Magsayo, kinsa adunay 17-0, 13KOs nga rekord, mao ang mopakita’g aksyon sa main event sa The Battle in Bohol nga ipahigayon karong Nobiyembre 24 sa Bohol Wisdom Gymnasium.
Atubangan sa iyang mga katagilungsod, depensaan ni Magsayo ang iyang World Boxing Organization (WBO) International featherweight title batok kang Japanese Shota Hayashi, kinsa adunay 30-6-1, 18KOs nga rekord.
Sa top supporting bout, si Pagara (28-1-0, 19KOs) makigbatok kang Tanzanian Mohammed Kambuluta (16-3, 6KOs) samtang si Santisima (14-2, 12KOs) makigharong kang Indonesian Kichang Kim (8-4-1, 2KOs).
Aduna pa’y laing unom ka mga parisan ang magbinukbokay sa promosyon.
Katapusang nakapahigayon ang Tagbilaran og Pinoy Pride boxing series niadtong 2012.
Ang mga tiket sa promosyon mapalit sa RD Pawnshops sa Tagbilaran, Bohol Tropics Resort, Wisdom Gymnasium, ug Abi’s Seafoods and Grill. (ESL)