KUSOG nga hangin nga adunay dalang uwan ang nasinati sa Sugbo kagahapon hinungdan sa pagkabalaka sa kadaghanan.
Kining di maayong panahon niresulta nga nalunod ang usa ka pump boat nga may sakay nga 14 ka mga pasahero ug tripolante sa Barangay Punta Engaño, dakbayan sa Lapu-Lapu kagahapon sa hapon.
Ang nasinati nga unos tungod sa grabe nga kusog nga hangin dinhi sa Sugbo.
Sa thunderstorm advisory sa Philippine Atmospheric, Geophysical and Astronomical Services Administration (Pagasa) lakip nga nakasinati ang mga dakbayan sa Sugbo, Mandaue, Lapu-Lapu, Bogo ug Danao.
Lakip niini ang mga lungsod sa Cordova, Consolacion, Lilo-an, Compostela, Carmen, Catmon, Daanbantayan, Medellin, Tabogon, Argao ug Dalaguete.
Matod ni Alice Canasa, weather specialist sa Pagasa Mactan, nga ala 1:45 sa hapon kagahapon sila nagsugod pagkasinati og kusog nga unos kun kusog nga hangin sa Mactan.
Usa ning Low Pressure Area sa habagatang bahin sa Mindanao sa rason sa pag-uwan uwan usab nga nasinati sa Sugbo.
Hinuon niabot ra sa 2 millimeters sa uwan ang natala kagahapon sa Pagasa tungod kay di kaayo kusog apan ang hangin maoy nanglabaw.
Dugang ni Canasa nga adunay nanawag sa ilang buhatan kagahapon kabahin sa giingong alimpulos sa dakbayan sa Sugbo.
Ug giklaro niini nga wa ma-rekord sa ilang radar ang giingong alimpulos.
Posible usab nga makasinati pa ang Sugbo og bati nga panahon sa mosunod nga adlaw tungod gihapon sa unos ug LPA.
Samtang sa nalunod nga pump boat, way naangol o kaha nakabsan sa kinabuhi niini, matod ni PO1 Marlou Bretania sa Mactan Police Station.
Ang 11 ka mga pasahero ug tulo ka mga tripolante nagbiyahe paingon sa Olango Island mga alas 2:05 kagahapon sa hapon dihang ang makina sa Natan Express passenger boat nga gidala ni Captain Freddie Sanchez Igot kalit napawong.
Mihunong ang makina pipila ka gutlo dihang nibiya sila sa Hilton wharf. Niini, matod ni Bretania nga wa na makontrolar ni Igot ang pump boat nga iyang gidala.
Ang pump boat, diin mga lima ka metros sila gikan sa baybayon, naigo sa kusog nga bawod ug kay kusog ang hangin, misud ang tubig sa pump boat hinungdan nga nalunod kini.
“Kusog gyud kaayo ang hangin ug dako ang bawod. Naghinay-hinay og sulod ang tubig mao tong nitikyaob ang pump boat. Ug wala unta to namatay ang makina, maka-maneuver ra unta to. Dili to masudlan og tubig,” matod sa pulis.
Midugang si Bretania nga swerte ang mga pasahero nga nahitabo kini kay diha pa sila duol sa baybayon.
“They were only about five meters from the wharf and they were still in chest-deep waters, so the passengers were able to swim to shore,” padayag niya.
Gibana-bana sa pulis ang danyos sa pumpboat nga anaa sa P400,000.