NAG-UNA ang top seed RCANS Team ug unom pang uban paghuman sa ika-duha nga round sa 4th Barangay Tablon 3-board Classification Chess Team Tournament niadtong Sabado, Enero 7, didto sa Tablon covered courts.
Gipilde sa RCANS, gilangkoban sa mga batan-on nga sila Romeo Canino, Aljie Cantonjos ug Me Ann Baclayon, ang Crossover Moves agi sa 2-1 nga resulta.
Nidaog ang RCANS batok sa Crossover agi sa mga daog nila Canino ug Baclayon sa una ug ikatulo nga board, sunod-sunod.
Giparot ni Canino si Randolph Dalauta, samtang gipildi ni Baclayon si Bel-Bel Cayaba.
Apan, si Tarsky Maestrado lang ang nibira og daog sa Crossover human gipilde niya si Cantonjos.
Nabugkos karon ang RCANS sa unang pwesto uban sa RPB Brave Knights, DOJ, Iligan Magnifico, Davao Executives, Batusisi Chess Team ug Forever Books nga adunay upat ka puntos matag usa.
Sa uban resulta sa ika-duha nga round, bantayanan ang DOJ nga gipangulohan ni Harrison Maamo sa Davao City human giblangkohan nila ang Davnor, 3-0.
Hulga sab ang pagkumbini ni RP Chess Olympiad men's team captain nga si James Infiesto ug Engineer Allan Diez sa una ug ikaduha nga boards human gisakwat nila ang Davao Executives ngadto sa 2-1 nga daog batok sa Blitz.