NABALAKA ang Reproductive Health & Wellness Center (RHWC-Davao) human padayong mitaas ang ihap sa mga nataptan sa balatian nga Human Immunodeficiency Virus-Acquired Immunodeficiency Syndrome (HIV-Aids) sa nasud diin nalakip sa talaan ang dakbayan sa Davao nga dunay daghang ihap sa mga biktima.
“Kahit sino naman hindi matutuwa kapag nakita mo na ganun ang trend, dumadami ang nagkakaroon ng HIV o nag-pa-positive sa Aids,” sulti ni Dr. Jordana Ramiterre, head physician sa RHWC-Davao.
Naalarma ang RHWC human dunay 772 ka mga bag-ong kaso ang natala gikan sa bulan sa Abril subay sa datus gikan sa Art Registry of the Philippines.
Segun ni Ramiterre nga ilang gidoble ang ilang pagpaningkamot sa matag karon ug unya nga pagpahigayon og mga libreng Voluntary Counselling and Testing (VCT) sa mga kabarangayan aron mahatagan og kaalam ang bisan kinsa nga mamahimong matakbuyan sa maong balatian.
“Kami dito sa RHWC, we are really strengthening our efforts to educate people,” butyag ni Ramiterre niadtong Huwebes didto sa iyang buhatan.
Sa datus nga gipakita sa opisyal gikan sa Department of Health (DOH) Epidemiology Bureau, ang 772 ka mga bag-ong kaso, nitaas og 38 porsiyento itandi sa samang takna niadtong tuig 2015 nga duna lamang 560 ka mga kaso.
Giingon nga 94 porsiyento niini ang mga lalaki, katunga ang anaa sa edad 25-34 anyos samtang 29 porsiyento ang nag-edad og 15-24 anyos.
“We are really, really encouraging people who are involved into this practices to see a doctor and submit themselves for a testing. Wala naman kayong dapat ika-takot,” ingon ni Ramiterre.
Ang Davao Region dunay 13 ka mga testing centers diin siyam niini naka-pukos sa dakbayan sa Davao, usa niini ang RHWC sa Jacinto Street, ug sa mga ospital ning dakbayan. (JPC)