Roldan: Kumusta na ang herbal industry?

NIADTONG Hunyo 30, 2015 nahimugso ang Philippine Traditional Alternative Herbal Medicine and Cosmetics Association (PhilTAHMCA).

Kapunongan kini sa mga tighimo, tigbaligya, tig-research sa mga inato nga tambal nga gikan sa tanum. Tuyo sa maong organisasyon ang pag-suspende sa Food and Drugs "ads order" diin gibutang nga ang tanang gibaligyang produkto dili makatambal ug dili gamiton sa pagpanambal sa bisan unsang sakit.

Mando kini nga gibatikos sa mga sakop tungod kay mora'g gibalikdad ang ilang kaldero bisan pa man kon daghang nagpamatuod nga makatambal ang herbal nga produkto nga ilang ginahimo.

Ang ikaduhang katuyoan sa organisasyon mao ang pagpalig-on sa mga "stakeholders" sa industriya sa herbal ug alternatibong tambal.

Liboan ka mga pamilya ang nagsalig niining industriya nga mapatay lamang sa gitawag nga "synthetic pharmaceutical industry" nga naggunit sa halos 90 percent sa tambal sa nasud.

Ang ikatulong katuyoan niini mao ang pag-standardize ug pag-professionalize sa pamaagi o "practices" sa mga nagpahamtang niini o mga "practitioners."

Apil na niini ang pamaagi sa paghimo ug pagbaligya sa mga herbal ug alternatibong medisina sa merkado.

Ug ang ikaupat nga maoy pinakataas nga katuyoan mao ang pag-amenda, pagpalambo o pag-implementar sa Republic Act 8423 o ang gitawag nga Traditional and Alternative Medicine Act of 1997 nga naila nga Tama Law nga giduso ni kanhi senador ug health secretary Juan Flaver.

Gikan niadto, nahimo ang PhilTAHMCA nga boluntaryong grupo nga nagduso sa adbokasya nga maila ug mapalambo ang herbal ug alternatibong medisina sa Mindanao.

Sa pagkakaron, ang herbal ug alternatibong medisina anaa pa gihapon sa poder sa Department of Health pharmaceutical division.

Kahibalo kita nga gunit sa mga higanteng multinational pharmaceutical companies ang maong departamento tungod sa binilyon nga kita niini gikan sa 100 ka milyon nga Pinoy.

Busa lisud kaayo banggaon ang maong industriya kung walay panaghiusa sa mga stakeholders sa Pilipinas ug walay hugot nga suporta gikan sa gobyerno. Makapangutana ko sa akong kaugalingon nga taliwala sa kabuhong sa Pilipinas sa "flora and fauna" nganong naiwit kini sa herbal ug alternatibong medisina kung ikumpara sa ubang nasud sa Asya?

Kung wa ko pasayop, 10 ra ka mga tanum nga makatambal ang naaprobahan nga ipadaghan ug ibaligya. Ang nakaparat pa kay ang uban natong tanum nga tambal sama sa kalamunggay na-patent na sa ubang nasud imbis nga ang Pilipinas.

Kung dili molihok ang PhilTAHMCA, kauban sa Chamber of Herbal Industry of the Philippines, gobyerno ug sa nagpakabanang lungsuranan nga nag-ilaid sa kamahal sa tambal sa ilang balatian, walay mahitabo sa industriya.

Sama sa sulti ni Presidente Joseph Estrada kaniadto, magpabilin kitang anaa sa "Kuko sa Agila" nga mga multinational pharmaceutical companies.

Karong Oktubre, makighimamat ang mga opisyales sa PhilTAHMCA, Davao Inventors Association, Community Broadcasters Association of the Philippines ug Davao Inventors Consumers Cooperative kang Presidente Rody sa Malacanang aron ipaabot ang mga isyung ilang gipakigbisogan.

Kahibalo ang grupo nga haduol sa presidente ang mga yano ug kabus nga tawo nga nagkinahanglan og barato apan epektibong tambal.

Haduol sab sa atong presidente ang taga Davao nga nisuporta sa iyang kandidatura. Good luck!

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph