NAPULO ka adlaw na nga naglingkod si Presidente Rody Duterte sa puwesto.
Tuod man, natinuod ang iyang gibahad nga pahinayon o wad-on ang naghitak nga druga ug kriminalidad sa nasud.
Liboan ka mga gidudahang sangkot sa druga ang nisurender ngadto sa kapulisan sa kalisang nga mahiapil sa listahan sa mga nipahulay sa dayon.
Kinsa bay dili malisang nga mokabat og 12 matag adlaw ang natikalbong nga mga gidudahang tigpayuhot og druga?
Kasagaran kanila nisukol daw sa kapulisan busa ilang gi-"neutralize."
Sagad sa mga nangamatay kay nakuhaan og pakite sa druga sama sa shabu ug armas de fuego busa naneguro ang kapulisan nga dili maunhan.
Mao kini ang mando ni Presidente Rody sa Philippine National Police (PNP) nga unahan na nila daan kung mameligro ang ilang kinabuhi.
Gihinganlan usab sa Presidente ang unang tulo ka heneral sa PNP, ug usa ka kanhing heneral nga mayor na karon sa usa ka munisipalidad sa Cebu nga protektor kuno sa druga.
Silang tanan naghupot kaniadto og taas nga posisyon sa PNP aron mosumpo ang pagkuyanap sa druga sa Pilipinas.
Siyempre gihimakak kini sa mga giakusahan sa presidente ug sayop kuno ang datos nga iyang nakuha.
Ang dakong pangutana kay nganong wala nila masumpo ang druga ubos sa ilang liderato isip mga heneral sa PNP?
Kung ilang gitrabaho ang ilang trabaho, basin dili mosangpot nga mangunay ang presidente pagtrabaho sa ilang trabaho nga dili niya trabaho!
Makalibog no?
Isunod kuno sa presidente ug ni PNP Chief Ronald "Bato" dela Rosa ang mga politiko nga protektor sab sa druga.
Tubag kini sa batikos sa madlang pipol nga ang mga gagmay ug butitingoy ra ang kayang dakpon ug i-"neutralize" sa PNP.
Tan-awa god ang listahan sa nabugha kung may dagkong isda ba?
Hinuon may mga pabrika sa druga ang na-raid na apan sagad sa madakpan kay mga trabahante nga lokal ug langyaw.
Ang uban pang Insik nga nadakpan di kabalo mosulti og English nga posibleng maingon nato nga trabahante ra sab.
Tungod niini, nagpakusog usab ang mga human rights groups aron maseguro nga dili magpasuwabi ang kapulisan sa ilang trabaho ug mayatakan nila ang tawhanong katungod sa akusado.
Busa niadtong Hulyo 3-5 nagpahigayon og Para-Legal Training sa mga women and child-rights advocates ang Ateneo Public Interest and Legal Advocacy (APILA) Center kauban ang Luna Legal Resource Center, Inc. sa Davao.
Ika-duha kining training nga gipahigayon sa maong pundok karong tuiga aron ma-armasan ang human rights defenders og himan nga maprotektahan ang katawhan, ilabi na ang mga timawa ug kabus nga babaye ug bata, sa pag-abuso sa tigpatuman sa balaod.
Walay problema sa kampanya ni Presidente Rody kay ang tanang human rights groups uyon nga sumpuon ang druga, kriminalidad ug kurapsyon sa katilingban apan ang gikabalak-an mao ang paghinumbra sa mandato ug abuso sa mga anaa sa gahum ug pagbutang sa balaod sa ilang mga kamot.
Kinahanglan nga palig-unon ang lima ka poste sa sistema sa hustisya (5 Pillars of Justice System) aron dili kita tawagon ang nasud nga way balaod ang DU30 regime.