PILA ka tulog na lang ug molingkod na si Mayor Rody Duterte isip ika-16 nga presidente sa Pilipinas.
Kung wala siya mosipot sa proclamation sa iyang pagdaug didto sa Kongreso, seguradong mosipot siya sa paghural kay gimando kini nga balaod.
Ang dili segurado mao ang singko minutos niya nga pakigpulong. Kung matinuod, mahimong rekord na kini sa pinakadaling inaugural speech sa presidente sa Pilipinas.
Apan daghang dili motuo niini kay gani ang iyang mga "midnight presscon" moabot ma'g sobra duha ka oras nga mora'g nag-lecture sa iyang mga estudyante.
Kita nga sakop sa media sa Davao, sinati na niini bisan gani ang iyang manerismo ug aksiyon, "gets" na kaayo busa makatabang kita pagpasabot sa atong mga kauban sa media sa laing lugar.
Sa paglingkod ni President-elect Mayor Rody manumpa usab ang iyang mga sakop sa gabinete.
Apil na niini ang kanhi Davao City Police Office Chief nga si Police Director Rolando "Bato" de la Rosa nga maoy mosunod nga Philippine National Police (PNP) Chief.
Di na mabangbang ang pagka-ilado ni Bato nga kanhi nagdala sa Presidential Anti-Organized Crime Task Force (PAOCTF) ni kanhi President Erap.
Siya ang awtor sa "Tuktok Hangyo" (Tuk-hang) sa mga suspetsadong nalambigit sa druga.
Bisan tuod kung duna nay susamang programa ang nag-una kaniya, siya ang nakapailado niini isip kampanya sa PNP sa pagsumpo sa nagkuyanap nga problema sa druga.
Sa panahon ni Mayor Alfredo Lim sa Manila, gipakaulawan niya ang mga drugista pinaagi sa pagpintura sa ilang pultahan nga target sa kampanya.
Sa paglingkod og balik ni Mayor Rody Duterte niadtong 2001, gipangayo niya sa tanang kapitan sa barangay ang pangalan sa tanang lumulupyo sa ilang lugar nga adik, gikatahapang tigpahuyot sa druga ug gigikanan sa druga.
Iya kining gisibya sa radyo ug sa iyang TV programang "Gikan sa Masa, Para sa Masa" aron mabadlong ug mapahimangnoan nga mohunong ug mogawas sa Davao aron dili mahisugamak sa iyang tamparos.
Sukad niini, nihinay ang druga apan wala mawala busa gipadayon ni Bato ang kampanya nga gitawag niya'g "Tuk-hang". Ginatuktok sa kapulisan ang mga gikatahapang adik, tigpayuhot, ug tiggama aron hangyuon nga mohunong o mosibat na sa Davao.
Tuod man, nihinay na sab apan wala mawala ang druga.
Daghan ang nituo, apil sila si Bato ug Mayor Rody nga apil ang pipila ka opisyal sa kapulisan sa mga protektor.
Karon kay nationwide na man ang gilangkuban sa trabaho ni Bato, posibleng masubli ang "Tuk-hang" nga panganlan og "Katok Pakiusap" o "Kat-pak" aron mahibal-an sa tanan nga wala nagkomedya ang bag-ong presidente sa pagsanta sa druga sa nasud sa pipila ka bulan sa iyang paglingkod.
Tuktukon nila ang pultahan, apil na niini ang mga dughan sa mga nalambigit sa druga sa tanang lugar sa Pilipinas ug hangyuhon nga "STOP" na!
Para kanako, maayo ang katuyoan niini tungod kay problema na kining pangkalibutanon nga nakabiktima sa minilyon nga katawhan.
Ang bantayan lang nato nga mahimong "extreme" ang kabangis nga mosangko sa pagbaliwala sa rule of law, abuso sa tawhanong katungod ug pag-abuso sa ilang awtoridad.
Nasud, andam na ba ta sa kabag-ohan ubos sa rehimeng Duterte?