TINGUHA karon sa National Bureau of Investigation (NBI) 7 nga ipabutang sa watchlist sa Bureau of Immigration ang tulo ka mga Romanian national nga gipasakahan og mga kaso tungod sa giingong kalambigitan sa ATM skimming.
Nagdumili na sila pagduso og counter-affidavit aron mapasaka na diretso ang kaso ngadto sa korte ug makaduso na sila og piyansa.
Kagahapon sa buntag, ipaubos sa inquest proceeding ni Asssistant City prosecutor Ma. Theresa Casiño ang mga Romanian national nga gikalambigitan sa ATM skimming nga silang Ion Costel alyas Alin Demitru Chirita ug alyas Daniel Dawis, Ionut Alexandru Mitrache ug Razvan Aurelian Stancu.
Wa pa madakpi nga giingong lain nilang kauban nga usa ka Mircea Jordan alyas Jozsef Gal.
Ang NBI nisang-at og reklamong kalapasan sa Republic Act 8484 kon Access Devices Regulations Act ug reklamong theft in relation to Cybercrime Prevention Act batok sa tulo.
Atol sa inquest proceeding, giangkon ni Costel nga nigamit siya og mga alyas aron makalukat og driver’s license dinhi sa Pilipinas.
Si Costel maoy kumon nga kaila nilang Mitrache ug Razvan apan ang duha di direktang managkaila.
Atol sab sa proceeding, gipahibawo ni Casiño kanila nga usa ka depositor sa Landbank Lapulapu branch ang ni-execute og affidavit labot sa pagka-skim sa iyang ATM card hinungdan nga dunay unauthorized withdrawals sa iyang account.
Niduso sab og affidavit ang mga gwardiya sa Landbank Escario branch nga magtumbok nga nakit-an ang duha sa mga suspek duol sa banko samtang nag-withdraw sa ilang ATM machine ang usa.
Nakahukom hinuon ang mga sinumbong nga Romanian national nga di na moduso og counter-affidavit ug didto nalang tubagon sa korte ang mga kaso batok kanila.
Matod sa ilang abogado nga si Christopher Ruiz buot mopiyansa ang iyang mga kliyente.
Tinguha sa NBI nga malutsan og hold departure order (HDO) ang tulo, sa higayon nga masang-at ang kaso sa korte ug makapiyansa sila.
Dugang ni NBI7 special investigator Florante Gaoiran nga ipabutang sab nila sa watchlist sa Immigration ang tulo aron di sila basta makasibat human sa ilang pagpiyansa.
Ang NBI nakig-alayon na sa kapulisan labot sa laing sakyanan nga giingong iya sa mga Romanian national, nga na-recover ug nakuhaan og P3 milyones nga kantidad sa kwarta.
Matod ni Gaoiran nga susihon nila kon makatabang kini pagpalig-on sa kaso batok sa mga suspek.