SAKOP sa Cebu City Transportation Office ang nasikop sa gihimong buy bust operation sa mga sakop sa Drug Enforcement Group-7 inabagan sa Regional Special Operations Group 7 alas 12:30 kagahapon sa udto sud sa usa ka pension house sa siyudad sa Sugbo.
Ang suspek giilang si Joselito Abesa Cabije, alyas Magu, 34, nag trabaho sa Citom, taga sitio Lawis, Barangay Pasil, siyudad sa Sugbo.
Lakip sa nasikop ang iyang kauban nga mao si Ronnie Torreon Sabanal, 40, taga F. Rallos street, Barangay Pasil.
Nakuha sa ilang posisyon ang tulo ka dagkong bulto sa gituohang shabu nga motimbang og 75 gramos nga gibana-bana nga mobalor og P885,000,00.
Dugang nakuha sa mga operatiba ang mga gamit sa pagtinda sa shabu sama sa timbangan, eco bag, cellular phone ug ubang drug paraphernalia.
Ang DEG-7 nga gipangulohan ni Supt. Glenn Mayam nakadawat og impormasyon tulo ka buwan na ang nakalabay labot sa illegal nga negosyo ni Cabije.
Ila kining gipanid-an hangtod nga ilang nasuta nga tinuod ang nakuha nga kasayuran.
Giangkon sa mga sakop sa DEG ug RSOG 7 nga naglisod sila sa pag-transact sa suspek tungod kay mag-usab-usab og lugar ug di usab mobaligya kon mogawas na sa Pasil.
Sagad anha kini sa mga motel ug pension house makig- transact aron di ma-monitor sa kapulisan.
Niadto pa untang Dominggo ang transaksyon, apan niingon si Cabije nga sila nasunogan. (AYB)