Sanchez nabalaka sa kahimtang ni Greco sa CPDRC

GIBATI og kabalaka karon si kanhi bokal ug karon Capitol consultant Grecilda “Gigi” Sanchez human siya makadawat ug impormasyon nga giinitan ang iyang igsuon nga si Leodegreco Sanchez sulod sa Cebu Provincial Detention and Rehabilitation Center.

Kini nunot sa pag-gawas sa iyang pangalan isip maoy hinungdan nganong gisuspenso ang dalaw alang sa tanang piniriso.

Gawas sa tinguha nga masiguro ang kaluwasan sa iyang igsuon, buot ni Gigi nga mabutangan og social worker ang prisohan nga motabang sa rehabilitasyon sa mga piniriso.

Nakig-tagbo si Gigi kang Gobernador Hilario Davide III kagahapon sa buntag, kauban ang pipila ka mga sakop sa ilang pamilya kinsa gibati usab og kahadlok sa kahimtang ni Greco.

Gipaabot niya sa gobernador ang kabalaka nga kulatahon o pasakitan ang iyang igsuon sa pipila ka mga binilanggo kinsa nagsagmuyo sa padayong pagsuspenso sa dalaw sa CPDRC.

Kini human makakuha siya og impormasyong gikan mismo sa kasaligang tinubdan nga adunay nasuko nga mga piniriso ngadto sa iyang igsuong binilanggo.

Una nang gipahibalo ni Civil Security Unit head ug task force CPDRC member, Bobby Legaspi, nga ang pagtinir ni Greco ug cellphone ug pagtext niini sa iyang mga contact gawas sa prisohan, maoy hinungdan sa kanselasyon sa dalaw.

Gihangyo ni Gigi ang go­bernador nga magbutang ug dugang security measure sa provincial jail aron dili mabiktima sa takal o pagpangulata ang iyang igsuon o si bisan kinsang piniriso, ilabi na kay usa ka government facility ang prisohan.

Gawas niini, gusto niya nga mabutangan ug resident social worker ang CPDRC nga makatabang sa rehabilitasyon sa mga piniriso.

Si Bise Gobernador Agnes Magpale misaad nga iyang hatagan og igong aksyon ang hangyo ni Sanchez, base usab sa manual nga napanday sa CPDRC.

Gitug-an usab ni Magpale nga gitabangan karon sa Provincial Council for the Welfare of Children ang mga anak ni Greco ug sa kapuyo niini nga si Maricel Gregory, kinsa lakip sa nabilanggo sa CPDRC tungod sa kasong may kalambigitan sa drugas. (AZDL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph