MIPIRMA og bag-ong promotional contract nga molanat og lima ka mga tuig ang batan-on ug potensyal nga boksidor nga si Jeo “Santino” Santisima sa ALA Promotions.
Human siya nasubhan sa nabantog na’ng Pinoy Pride sa sayong bahin ning tuiga, si Santisima, kinsa adunay 12-2, 11KOs nga rekord, nakasagubang pa og laing tulo ka mga away.
Ning mga awaya, ang 20 anyos nga lumad nga taga Masbate nakapakita nga aduna siya’y dakong potensyal gumikan kay iyang gipanglupig ang dekalidad niya mga nakontra.
Ang labing unang mayorihiyang away ni Santisima nahitabo sa undercard sa Pinoy Pride 35 “Stars in the Making” niadtong Pebrero ning tuiga diin kadungan niya sila si Melvin Jerusalem ug amateur sensation KJ Cataraja.
Nasugakod ni Santisima ang labing una niyang malisod nga pagsuway dihang mikulit siya og 6th round stoppage batok sa beteranong si RP super flyweight ug bantamweight champion Marco “Singwancha” Demecillo (22-5-1).
Nakaposte si Santisima og knockout nga kadaugan sa undercard sa Donaire-Bedak world championship niadtong Abril.
Niadtong Hulyo, siya maoy co-main event fighter sa IDOL 2 diin iyang gi-knockout si Indonesian super flyweight ug bantamweight champion Junior Bajawa sa 3rd round.
Sa labing ulahi niyang away, iyang gi-TKO sa 10th round si kanhi WBC International bantamweight king Rex Wao sa miaging buwan.
“He (Santisima) should have a breakout year in 2017, as he is exciting to watch. He has the power and heart to become a star and world champion,” matod ni ALA Promotions president Michael Aldeguer.