GIHATAGAN sa Cebu City Government og cash incentives ang mga city scholar nga ni-graduate isip cum laude niadtong tuig 2015 ug 2016 sa mga eskwelahan nga accredited sa dakbayan.
Base sa ilang record 364 ka tinun-an ang ni-graduate with honors, diin 344 ka tinun-an ang nilampos sa ilang pagtuon isip cum laude, 19 ka Magna Cum Laude ug usa ka summa cum laude nga gikan sa Asian College of Technology International Education Foundation (ACTIEF).
Base sa ordinansa sa dakbayan sa Sugbo nga gipanday ni kanhi Konsehal Alvin Dizon nga makadawat og P20,000 ang summa cum laude, P15,000 sa magna cum laude ug P10,000 sa cum laude diin ang makadawat niini kadtong ni-graduate sa tuig 2015 pataas.
Apan si Konsehal Joy Augustus Young, chairman sa committee on education sa konseho, nagkanayon nga luoy ang mga pioneering graduate sa City Scholars
“Sayop ni (nga ordinance) kay ang atong primerong graduate 2014 man wa maapil so atong amendahon ang ordinansa aron maapil ang ni-graduate og 2014 sila goy first batch,” paghulagway ni Young.
Si Lyka Remeticado, ang labing unang summa cum laude graduate sa City Scholarship Program sa City Government kinsa nitungha sa ACTIEF ubos sa kursong Bachelor of Science in Business Administration Major in Operation’s Management, nagpasalamat sa siyudad.
“For now, half should be kept in the bank and half of it will be spent for Christmas and other will be distributed to my father and mother,” pahibawo ni Remeticado kinsa taga Barangay Tisa.
“Makatabang gyud ni siya nga kwarta. I was not expecting nga after I graduate mangita dayon ko og trabaho so I was just called nga naa tong incentives. Wala ko na–aware so I guess this is really a blessing especially this Christmas,” dugang labing unang summa cum laude sa City Scholars.