MAGSAYSAY, Davao del Sur - Gimando na sa mayor ning lungsod ang pagpahugot sa seguridad sa mga barangay ilabi na ang mga dapit nga adunay mga ekipo sa pribadong kompaniya nga gikontrata sa alang sa pag-konkreto sa mga kadalanan.
Matud ni Mayor Arthur Davin nga dili angayang mabalda ang konstruksyon sa mga kadalanan sanglit adunay gitakdang petsa ang pagtapos niini.
Usa sa mga hinungdan nga nadelatar ang pagtrabaho sa mga Farm-to-Market Road (FMR) mao ang presensiya sa mga gituohang sakop sa rebeldeng New People's Army (NPA).
Kahinumdomang gisunog sa mga walhong komunista ang usa ka backhoe didto sa Barangay New Ilocos niadtong Miyerkules sa gabii.
Sa padayong imbestigasyon sa kapulisan sa lugar milutaw nga mga sakop sa Committee Front 72 sa NPA sa Far South Mindanao Region (FSMR) ang misunog sa backhoe pinaagi sa pagbubo og upat ka litrong gasolina human narekober nila ang duha ka basiyong galon nga gibilin sa lugar.
Ang backhoe gipanag-iyahan ni Alejandro Tolero, molupyo sa Barangay Colorado, siyudad sa Digos ug maoy nagtrabaho sa konstruksyon sa dalan didto sa Barangay Blocon.
Aminado ang lokal nga gobyerno nga nabalda ang trabaho sa proyekto apan nangita na og paagi ang kontraktor nga mapadayon kini sa sunod semana.
Si Davin nagmando sab sa kapulisan nga pahugtan pagbantay ang mga ekipo sa lugar.
Hinuon, nagbutang na og puwersa ang 39th Infantry Battalion (IB), Philippine Army sa lugar aron motabang sa kapulisan.
Nagpadala na sab og dugang personahe ang 2nd Maneuver Battalion sa Davao del Sur Provincial Police Office (DSPPO) aron bantayan ang mga gitrabahong kadalanan.
Gituohang panimawos sa mga NPA ang ilang gihimo human naharang sa checkpoint didto sa Barangay Tacul ang tag-as nga kalibre sa armas nga buot nilang palutson di pa dugay.
Nangandam na sab ang militar ug kapulisan sa pagsiaw sa mga rebeldeng komunista human gimando ni Presidente Rodrigo Duterte nga tinud-on na ang paglutos kanila.