PATAY ang security guard sa San Lorenzo Farm human gipusil samtang nagmaneho sa iyang motorsiklo alas 7:45 sa buntag kagahapon didto sa Kilometro 21, Crossing Ula, Barangay Ula, Tugbok District, siyudad sa Davao.
Si Chief Inspector Randy Sambalud, hepe sa Tugbok Police Station, nag-ila sa biktima nga si Remegio Claonan Millan, 57, minyo, ug residente sa Purok 13, Barangay Tugbok Proper, ning siyudad.
Ang biktima usa ka retired Army kinsa nahimong security guard sa San Lorenzo Farm nga gipanag-iyahan sa Lapanday Foods Corporation (LFC) sa Barangay Pangyan, Calinan District.
Sa inisyal nga imbestigasyon sa Homicide Section sa Tugbok police, nagmaneho sa motorsiklo ang biktima gikan sa iyang gitrabahoan padung sa ilang balay, apan pag-abot sa Crossing Ula, kalit siyang gipusil sa makadaghang higayon sa wa mailhing mamumuno kinsa sakay sab sa singgol nga motorsiklo.
Tunga sa kalsada nahagba ang biktima, samtang ang mamumuno mipaturatoy sa wa matino nga direksiyon.
Ang patay nga lawas sa biktima anaa gidala sa Angel Funeral Parlor sa Calinan ning siyudad.
NPA ang nagpatay?
Samtang nagpadayon ang imbestigasyon sa kapulisan sa Tugbok police, wala giwala sa ilang imbestigasyon ang anggulo sa kalambigitan sa trabaho sa biktima.
Giingon sa kapulisan nga wala nila giwala ang anggulong personal grudge ugaling dunay nakabangi ang biktima ug gipanimaslan kini.
Sa pagpanubay sa SunStar Super Balita, dunay hungihong nga migula nga lagmit New People's Army (NPA) ang mikutlo sa kinabuhi sa biktima.
Kahinumdoman, bulan sa Abril 2017, gisulong sa mga NPA ang Lorenzo Farm sa Barangay Pangyan, diin gipanguha ang upat ka mga shotguns ug usa ka M-16 Armalite rifle gikan sa mga security guards sa kompaniya.
Ang kauban sa biktima niadtong higayona nga si Rico Truz Badil Jr., mipatim-aw sa kapulisan sa Calinan kinsa nagpa-blotter human makaangkon og samad sa tangkugo atol sa pag-atake sa mga NPA.
Dungan sa hitabo, gisunog sa mga NPA ang Lapanday box plant ug plastic plant sa Barangay Mandug, Buhangin District, ug nagpabuto og landmine nga gikamatay sa manindahay og isda nga si Larry Timbal Buenafe kinsa miagi sa dapit niadtong higayona.