IMBESTIGAHON sa Cebu City Police Office ang upat ka mga pulis nga giingong nagdawatan og sinimanang payola gikan sa duha ka mga drug pusher nga nadakpan.
Niadtong Sabado sa kaadlawon, duha ka mga babaye ang nadakpan sa mga sakop sa City Anti Illegal Drugs Special Operations Task Group (CAIDSOTG) nga gipangulohan ni Sr. Insp. Narrolf Tan.
Sila si Lolita Dionson Maranga ug Virginia Montemor Molina nakuhaan og mga pinakete sa ginadiling drugas.
Ang duha ningtug-an sa imbestigasyon nga dunay usa ka sakop sa Punta Princesa police station nga magdawatan kanila og P5,000 matag semana.
Tungod niini, si CCPO Director Sr. Supt. Joel Doria nimando dayon sa iyang mga sakop nga ipaubos sa imbestigasyon ang pulis nga gipasanginlan sa duha.
Aron masugdan ang imbestigasyon ug lig-on ang ebidensya, iyang gipakuhaan og pinanumpaang pamahayag ang namasangil.
Kon masuta nga dunay kamatuoran, iya kining parelibohan ug pasakaan og kasong administratiba.
“Pinapa-execute natin ng affidavit (pusher) doon sa allegation nya na may mga police na involved. Ang ginawa natin ngayon is ongoing yung validation, ginagawa na natin ng summary information. We will inform the RD and R2 accordingly,” matod ni Doria.
Dugang ni Doria nga di lang usa, kon di upat kini ka mga pulis nga ipaubos sa imbestigasyon sanglit nilutaw usab ang laing mga ngalan sa tulo ka mga pulis nga magdawatan og sinimana sa usa ka drug personality.
Hinuon, wa wad-a ang posibilidad nga gimugna-mugnaan lang og istorya ang upat ka mga pulis hinungdan nga angay nga susihon pag-ayo sa iyang mga imbestigador.
Si Police Regional Office Director Chief Supt. Noli Taliño, sa iyang bahin, kanunay makadawat og report labot sa mga pulis nga hangtod karon duna pay mga pulis nga wa moundang sa illegal nga kalihukan.
Matod ni Taliño nga makadawat siyag reklamo pinaagi sa text ug suwat labot niining pagpangayo og payola sa mga pulis sa mga durugista bisan sa kaestrikto na sa pamunoan ni Presidente Rodrigo Duterte.
Di magduha-duha si Taliño sa pagpatangtang sa serbisyo niining mga pulis nga nagpadayon sa ilang naandan nga illegal nga binuhatan.
“May mga na reresib pa rin akong information, text message, yung iba sulat na may mga pulis pa rin na nainvolved sa drugs as protectors. So, yun ang ating pinapaimbestihan. Kung ma confirm sa pag validate na talagang protector siya ng illegal drugs, kakasuhan natin siya,” matod ni Taliño.
Samtang nimando si Taliño sa pagpangita niadtong tag-iya sa dul-an P6 million nga shabu nga nasakmit sa mga sakop sa Regional Special Operations Group-7.
Ang drugas giingong gikan ni alyas Sinid apan gipaagi, matod pa, ngadto kang alyas Weng-weng nga mao ang naghatag kang Edward Luzon, 18, taga A. Lopez, Barangay Labangon, siyudad sa Sugbo.
Nagtuo siya nga ang karaan pang stocks sa shabu ang gipagawas karon sa mga drug player sanglit nimahal ang balor karon tungod sa kaminus sa supply niini.