PILA ka adlaw na lang ug Agosto na. Saulogon sa lalawigan sa Cebu ang ika-447 nga kasumaran sa pagkatukod niini.
Syempre, daghan ang giandam nga mga kalihukan. Atangi.
***
Laing kasaulugan nga giatangan labina sa mga deboto mao ang kapistahon sa mga santos nga sila si Sta. Filomena ug San Roque.
Mga usa ka bulan kapin na tingali nga nangandam ang mga lumulupyo sa Poblacion, Oslob alang sa pista ni San Roque sa ikatulong semana sa Agosto.
Usa sa kalihukan mao ang paghimo sa Sadsad Festival diin magtigi ang lainlaing mga purok sa barangay. Usa kini ka kalihukan nga gipasiugdahan ni kanhi Poblacion Brgy. Captain Emelito ‘Tata’ Abines adtong panahon sa pagsikat sa kantang Dayangdayang.
Ang Dayangdayang ang nag-abli sa maong kalihukan apan tungod kay nalantawan na nga moawop ang kasikat sa maong kanta mao nagpa-compose gyud si Kapitan Tata og jingle diin gitipo ang ethnic ug Latin beats.
Nahibalo ko ani kay ako mismo (!) ang nisugyot niini kang Kapitan Tata ug maoy nangitag composer nga mohimo sa jingle. Dakodako sab ang nagasto sa barangay pagpahimo sa maong jingle.
Pila ka mga higalang choreographers ug opisyal sa lalawigan niangkon nga paborito nila ang Sadsad Jingle. Subo lang palandungon nga dunay ubang dapit sa lalawigan (di lang ko mohingalan bisan nakahibalo ko) nga nigamit niini.
Sa binugoy pa nga pagkasulti, nidawat rag limpyo. Hinaut nga undangon na ninyog gamit niini ug magpahimo mog inyong kaugalingon nga jingle.
Makatabang ko pagpangitag composer alang niini. Pramis.
***
Mas ginindutan ko sa pelikulang Dukot kay sa Ma’ Rosa bisan pag nakadawat og pagdayeg ang nauwahi sa Cannes Film Festival sa France ug gani nakadaug pag best actress award si Jaclyn Jose.
Ki-at kaayo ang camera sa Ma’ Rosa. Makalabad sa ulo. Nakuyawan gani ko nga mobalik akong vertigo nga nasinati nako usa ka bulan kapin na ang nakalabay.
Mokalit pa gyud og zoom in ug fade out sa mga butang nga pwede rang di ipakita sama sa key chain ug pedal sa bisikleta.
Bitin pa gyud ang istorya. Way lalis, natural kaayo si Jaclyn apan dihang nipakita na siyag ka-intense sa pag-arte (dihang naghilak siya sa hilom samtang nagkaon og squid balls sa daplin sa karsada), kalit nahuman ang istorya.
Ha? Mao ra to? Kulang uy!
Sa laing bahin, nindot ang pagkahimo sa Dukot. Maayo sab moarte ang mga artista. Kinsay gibangaan nila ni Ricky Davao, Christopher de Leon, ang magsuong Medina ug si Enrique Gil mismo?
Di pod ka makabatig kakulang sa pagtapos sa pelikula. Gani, duna pa kini leksyon. Mao tingali nga mas daghan ming nanan-aw sa Dukot kay sa Ma’ Rosa (gawas nga mas na-promote ang nahauna).
***
Nindota sa lugar nga gisyutingan sa Imagine You and Me. Sa Italya man kuno to. Natural pod moarte sila si Alden Richards ug Maine Mendoza. Wa kaayoy lisod nga esena nga kinahanglan og intense acting.
Maayo sab moarte sila si Irma Adlawan, Jasmine Curtis-Smith, Kakay Bautista ug ang lain pang komedyante nga nalimtan nako ang ngalan (soweee!).
Ugaling lang kay dunay mga esena nga nakulangan ko ug ang istorya dunay buslot sama niadtong hapit na kini mahuman. Dihang naaksidente si Maine giingon nga gamay ray kahigayunan nga makamata pa kinig balik gikan sa coma.
Abi nakog nag-imagine na lang si Alden nga nagkauban sila ni Maine sa ilang pupanumpa chuchu sa istatuwa ni Juliet (sa istoryang Romeo & Juliet). Tinuod diay. Way klaro.
Akoy direktor sa sunod ninyong pelikula bi. Weeey! Hahaaa! Da haws is nat dahum!
***
Atangi ang pagbisita nila ni Bea Alonzo ug Gerald Anderson karong Lunes, Hulyo 25. Isalida ang ilang pelikulang How To Be Yours sa Miyerkules, Hulyo 27. Kitakits!