COTABATO CITY -- Duha ka lalaki ang nadakpan sa kapulisan human nakuhaan og shabu nga gisulod sa diaper sa usa ka bata, alas 4 sa hapon niadtong Huwebes, Setiyembre 29, didto sa probinsiya sa Maguindanao.
Giila ang mga suspek nga sila Hamsadin Tapa Rasul ug Jihad Asi Abas, taga dalang Mabini, Barangay Bugua 3, Cotabato City.
Matud ni Maguindanao Provincial Police Office Director Nickson Muksan nga nakadawat sila og taho nga dunay duha ka lalaki nga sakay og motorsiklo nga naay dala nga 2 anyos nga bata gikan sa Talitay, Maguindanao ug paingon sa Cotabato City nga nagdala og shabu.
Ang mga suspek giatngan sa kapulisan didto sa Datu Anggal, Midtimbang ug gipahunong ang gisakyan nga motorsiklo ug gikapkapan apan walay nakita nga illegal drugs kanila.
Apan sa diha nga gi-abrihan ang diaper sa 2 anyos nga bata nga anak ni Rasul, didto nakita ang 20 gramos nga shabu.
Kahinumdoman nga niadtong miaging semana usa ka Miriam Talusan ang nakuhaan sab og shabu nga kantidad og tunga ka milyon ka pesos sulod sa diaper nga iyang gisuot sa Datu Anggal Midtimbang.
Gisang-at na batok sa mga dinakpan ang kaso nga naglapas sa Section 5 Republic Act 9165 o Comprehensive Dangerous Drug Act of 2002.