SITG mosusi sa mga bukog, misteryo sa pulis

GIUMOL sa kapulisan sa probinsya sa Sugbo ang Special Investigation Task Group aron pag ila sa mga bukog nga nakapklagan sa bukirang barangay sa lungsod sa Badian niadtong Dominggo sa hapon.

Ang lakang gihimo bisan sa nakuhang mga identification sa crime scene nga iya ni PO1 Jimmy Jorge nga na-missing sukad niadtong hinapos sa 2013.

Una nang gidudahan nga ang mga bukog nga nakita sa sitio Kulabtingon, Barangay Santicon, lungsod sa Badian iya ni Jorge, pulis nga sakop sa Tourist Police Unit sa Cebu City Police Office (CCPO) human makuha ang usa ka belt bag nga dunay sulod nga identification card sa lisensya sa armas sa police.

Apan ang CPPO mopalawom sa ilang imbestigasyon aron pagklaro kon ang maong bukog gipanag-iya ba gyud ni Jorge pinaagi sa pag umol sa SITG nga gilangkuban sa PNP Crime Laboratory, Provincial Intelligence Branch ug Badian police station.

Gawas sa pagpaubos sa deoxyribonucleic acid (DNA) test sa mga bukog kuhaan kini og dental records sa PNO health service ug itandi sa records ni Jorge.

“Makita na sa dental records sa PNP Health Service kon ang bukog mao ba gyud si PO1 Jorge kay before siya nadawat pagkapulis, gipaubos sila og dental exam,” matod ni Sr. Supt. Noel Gillamac.

Wa pay nahuna-hunaan ang SITG nga hinungdan sa kamatayon ni Jorge sanglit wala pa silay nakuha nga kasayuran.

Gawas sa mga ID ug ubang mga butang nga nakuha sa crime scene, nakakuha usab ang Scene of the Crime Operatives (SOCO) og usa ka cellphone nga posibling makatabang sa imbestigasyon sa kapulisan lakip na ang usa ka armas nga naa na sa kustodiya sa PNP Crime Laboratory.

“A .357 revolver firearm was recovered in the crime scene nga toa na sa Badian police station. Naay usa ka spent shell ug upat ka loaded nga bala sa armas,” dugang ni Gillamac.

Ang hepe sa Badian police station, Sr. Insp Henry Orbiso, nitug-an nga iya nang nahinabi ang asawa ni Jorge nga si Manilyn ug misaysay kini nga niadtong Pebrero 24, 2014 pa sila nagsige og pangita.

Giingong magsige og ring ang cellphone sa iyang bana ug di usab mo reply sa iyang mga text nga maoy hinungdan nga pagka Pebrero 25, 2014 ila kining gipa blotter sa Pardo police station nga missing.

“Nananghid daw na iyang bana nga mo-duty. Unya natingala na man siya nga di na mobawos sa text unya tawgan dili motubag mao tong giadto nila sa Cebu City Hall kay body guard man ning mayor. Wala naman nila makit-i mao tong gipa blotter nila sa Pardo pagka Pebrero 25 last year,” sigon ni Orbiso.

Usa usab sa tan-awon sa SITG kon wa bay kalambigitan sa illegal nga drugas ang kamatayon sa maong police human masuta nga ang lugar diin nakaplagan ang mga bukog naila nga dunay marijuana plantation.

“Sa una nga reports, kanang lugara naay mga marijuana plantations. Gani atong police sa Badian nag conduct na og operations dinha uban sa AFP,” dugang ni Gillamac.