WALA pay direktiba ang gihatag ngadto sa 10th Infantry Division (ID) sa pagsuspende sa military operations (Somo) o temporaryong ceasefire uban sa komunistang grupo alang sa taliabot nga kapaskohan.
Si Captain Jerry Lamosao, pangulo sa 10ID Division of Public Affairs Office (DPAO), nagsulti nga bisan pa sa pag-undang sa hinabing pangkalinaw tali sa kagamhanan ug sa Communist Party of the Philippines (CPP), ang taas nga buhatan wala pa sila makadawat og mando gikan kanila nga hunongon ang ilang operasyon batok sa mga rebelde sa kasaulogan sa Pasko.
"Wala pong ibinabang direktiba regarding Somo," matud ni Lamosao.
Ang Somo nagpasabot nga ang tropa sa kagamhanan mohunong sa ilang gilusad nga opensiba batok sa NPA apan wala kini maglangkob sa regular nga pagpanakop sa nakalapas sa balaod, naglakip sa pagsilbi sa warrant of arrests.
Sa dihang gipangutana kon posible ba nga ang Somo di mapatuman karong tuiga tungod sa tensiyon sa revolutionary government ug sa commander-in-chief, Presidente Rodrigo Duterte, human sa atake sa NPA nga mipatay og bata sa Bukidnon, mibalibad siya nga mohatag og pamahayag.
"We cannot make a statement yet about it whether possible or not," tin-aw niya.
Sa milabay'ng tuig, dunay Somo atol sa gipatuman nga unilateral ceasefire aron nga tugtan ang NPA makasaulog sa Pasko uban sa minahal nila sa kinabuhi.
Apan si Lamosao misaad nga bisan og naa o wala ang Somo, pabilin silang alerto alang sa bisan unsang hulga sa mga lawless armed group batok sa mga sibilyan.
"Rest assured, we are ready and our efforts are continuously conducted especially focused military operation and community support program," pasalig niya.
Gipahimangnoan na ang ilang tropa ug ang mga pulis batok sa posibleng atake nga himuon sa mga rebelde sa mga mosunod nga adlaw samtang nagkaduol ang anibersaryo sa ika-49 nga tuig sa CPP.