HULAGWAY sa spotter ug sa gunman sa pagbanhig-patay sa bise mayor sa lungsod sa Ronda, Atty. Jonnah John Ungab, gipagawas na sa Cebu City Police Office (CCPO) aron makita sa publiko ug motaho sa kapulisan sa posibling nakaila niini.
Gipakita sa Task Force Ungab ang kuha sa CCTV camera nga gihuptan sa CCPO.
Gihulagway ni Sr. Insp. Jonathan Taneo, hepe sa Homicide Section sa CCPO, ang spotter nga nagsul-ob og t-shirt nga itom nga dunay marka nga 'I Heart SG kun I Love Singapore.'
Ang naa sa hulagway usa na ka hamtong.
Sa laing kuha sa CCTV camera, nakita usab ang direksyon sa pagsibat sa gun man ug sa kauban niining drayber r nga mipaingon sa siyudad sa Mandaue.
Ang duha nakuhaan pa og video sa maong syudad nga gituohan nga milahos sa siyudad sa Lapu-lapu o lungsod sa Consolacion.
Palapdan pa nila ang pagpangita sa mga CCTV camera sa siyudad sa Mandaue ug Lapu-Lapu aron masubay kon asa nihunong ang mga mamumuno.
Gitahasan sa Task Force Ungab ang City Intelligence Branch nga makig-alayon sa ilang counterpart sa naasoyng mga siyudad.
Wa pa mailhi sa Task Force ang ngalan sa gituohang spotter tungod kay wala gipraktis sa Palace of Justice nga pangayoan og identification ang mga tawo nga mosulod sa Qimonda IT Center.
Tungod niini, nanawagan karon ang kapulisan sa publiko sa nakamay-ong sa panagway nga ilang gipakita nga motawag sa ilang hot line nga 0943-422-1841 ug sa landline number nga 032-266-5494.
“Mao ni ang picture sa atong persons of interest nga makita dinhi ang iyang dagway no nya naa pud ang sakyanan sa biktima. Ang amo lang panawagan sa public nga kon nakaila sila sa dagway ani, motawag lang sila sa atong hotline,” matod ni Taneo sa mga tigbalita.
Wala pa usab nila wad-a ang tulo ka mga anggulo nga ilang gisubay kini naglangkob sa personal nga motibo, may kalabotan sa trabaho ug ang pulitika.
Matod ni Supt. Ryan Devaras, task force commander, nga sa iyang nakita sa gun man siya nagtuo nga usa ka professional hitman tungod sa pamaagi sa pagpusil niini diin ang tanang duha ka mga bala nga iyang gipa buto pulos miigo sa ulo ni Ungab.
Ang National Bureau of Investigation (NBI) ug Task Force Ungab nagbinayloay na og impormasyon sa nagpadayong imbestigasyon ug sila nanghinaot nga sa mosunod nga mga adlaw, masulbad ang kasong pagpatay ni Ungab.